सर्लाहीमा विश्वकर्माको मूर्ति विसर्जनमा पनि विवाद, सशस्त्र प्रहरीकाे गाडीमा ढुंगामुढा

३ असोज, काठमाडौं । सर्लाहीको ब्रम्हपुरी गाउँपालिकामा विश्वकर्माको मूर्ति सेलाउने विषयमा स्थानीयबीच विवाद उत्पन्न भएको छ । त्यसक्रममा केही व्यक्तिले ब्रम्हपुरी गाउँपालिका कार्यालयमा तोडफोड गरेका छन् । उनीहरुले सशस्त्र प्रहरीको गाडीमा ढुंगामुढा गरेका छन् ।

मंगलबार दिउँसो विश्वकर्माको मुर्ति सेलाउने जाने रुटको विषयमा विवाद उत्पन्न भएको थियो । अराजक समूहले विश्वकर्माको मूर्ति सेलाउन जाने रुट नजिकैको मुस्लिम बस्तीलाई बनाउन खोजेको प्रहरीको दाबी छ । घटनामा संलग्न कसैलाई पनि पक्राउ नगरिएको र परिस्थिति सामान्य भइसकेको प्रहरीले जनाएको छ । साेमबार विश्वकर्माकाे पूजा भएकाे थियाे ।

करिब दुई हप्ताअघि सर्लाही सदरमुकाम मलंगवामा कृष्ण जन्माष्टमीको मुर्ति सेलाउने क्रममा केही उच्छृंखल समूहले हिन्दु मुस्लिम बीचको साम्प्रदायिक सद्भाव विथोल्ने प्रयास भएपछि स्थानीय प्रशासनले १४ घण्टासम्म कर्फ्यू लगाएको थियो । पछि क्रमशः निषेधाज्ञामा रुपान्तरण भएको थियो । पछि हिन्दू र मुस्लिम समुदायका अगुवा, स्थानीय प्रशासन, विभिन्न राजनीतिक दलका नेता र जनप्रतिनिधिहरुको प्रयासले मलंगवाको अवस्था सामान्य बनेको थियो ।