दलाल पूँजीवादका कारण संविधान कार्यान्वयन प्रक्रिया जटिल बन्याे : माधव नेपाल

३ असोज, काठमाडौं । नेकपा (एकीकृत समाजवादी)का अध्यक्ष माधवकुमार नेपालले दलाल पूँजीवादका कारण संविधान कार्यान्वयन प्रक्रिया जटिल भएको बताएका छन् ।
बुधबार नेपाल रिटर्नी एशोसिएशनको प्रथम राष्ट्रिय भेलालाई सम्बोधन गर्दै उनले नोकरशाही पूँजीवादले नेपालको राजनीति र अर्थतन्त्रलाई कब्जामा लिएका कारण संविधान कार्यान्वयनमा समस्या भएको बताए । 
उनले समाजका शोषणको नयाँ नयाँ रूपहरूलाई अन्त्य गर्दै राष्ट्रिय पूँजी विकासको वातावरण तयार नगरेसम्म संविधानमा लेखिएको कुरा व्यवहारमा लागू गर्न नसक्ने निष्कर्ष सुनाए । संविधानले सबै प्रकारका अधिकार दिएको तर दलाल र स्वार्थ समूहका कारण कार्यान्वयनमा भने चुनौती रहेको उनले बताए । दलाल मानसिकताका कारण जनतालाई मौलिक हक, अधिकार र सामाजिक न्याय दिने कुरामा समस्या परिरहेको बताए । संविधान कार्यान्वयनमा सबै दल एक ठाउँमा उभिनुको विकल्प नरहेको उनको भनाइ छ । आज सरकार र राजनीतिक दलहरुले आठौं संविधान दिवस मनाएको छ ।