त्याग र बलिदानबाट प्राप्त अधिकार बचाउन राज्यको चरित्रको पुनःसंरचना आवश्यक : राष्ट्रपति पौडेल

३ असोज, काठमाडौं । राष्ट्रपति रामचन्द्र पौडेलले विभिन्न आन्दोलनबाट प्राप्त उपलब्धि रक्षा गर्न सबै दल एक ठाउँमा उभिनुपर्ने आवश्यकता रहेको बताएका छन् । त्याग र बलिदानबाट प्राप्त अधिकार बचाउन राज्यको चरित्रको पुनःसंरचना आवश्यक रहेको बताए । 

संविधान दिवस तथा राष्ट्रिय दिवस २०८० को उपलक्ष्यमा बुधबार राष्ट्रपति भवन शीतल निवासमा आयोजित कार्यक्रममा बोल्दै राष्ट्रपति पौडेलले जनआन्दोलनका उपलव्धिहरुलाई कमजोर पार्ने काम हुन सक्ने भन्दै सचेत हुन समेत आग्रह गरे । 

जनअनुमोदित संविधानसभाबाट निर्माण भएको लोकतान्त्रिक संविधान कार्यान्वयनमा सबै दल मिलेुर अगाडि बढनुपर्नेमा जोड दिए । प्राप्त अधिकार निस्तेज पार्ने काम कतैबाट हुन नपाओस् भन्नेमा चनाखो हुनुपर्ने उनले बताए ।

व्यवस्था परिवर्तन भएपनि देश समाज र जनसामान्यको अवस्थामा भने अझै परिवर्तन हुन नसकेकाले राज्यको चरित्रको पुनःसंरचना आवश्यक रहेको बताए । मुलुकको तीव्र विकासका लागि सबै तहका सरकारबीच समन्वय आवश्यक रहेको बताए ।