रामारोशनमा ३५ देशका ४ हजार पर्यटक प्रवेश गर्दै, भारतकाे बाटाे हुँदै आएकाले पाए अनुमति

४ असोज, काठमाडौं । सुदूरपश्चिम प्रदेशको प्रसिद्ध पर्यटकीय स्थल रामारोशन प्रवेशका लागि दुई दर्जन भन्दा बढी मुलुकका पर्यटकले अनुमति पाएका छन् । अवाञ्छित गतिविधि गरेको पाइएपछि स्थानीय प्रशासनले अनिश्चितकालका लागि रामारोशन प्रवेशमा रोक लगाउँदै आइरहेको थियो । 

बुधबार गृहमन्त्रालयले उच्च निगरानीमा राखेर प्रवेश गर्न दिन पत्राचार गरेपछि प्रवेश खुला भएको जिल्ला प्रहरी कार्यालय अछाामले जनाएको छ । ३९ पर्यटक रामारोशन पुगेर बिचैमा रोकिएका थिए । बिहीबारसम्ममा २ सय ८३ जना विदेशी पर्यटकले प्रवेश अनुमति पाएका छन् । रोकिएका पर्यटक गन्तव्यतर्फ गएका छन् । 

रामारोशन क्षेत्रमा जान धेरै संख्यामा विदेशी पर्यटक आएका कारण आवश्यक कागजातको अभाव देखाउँदै उनीहरुलाई जिल्ला प्रशासन कार्यालयको निर्देशनमा प्रवेशद्वार चौखुट्टे, बेलखेत र रामारोशन क्षेत्रमा रोकेका थिए । वर्ल्ड रेन्वो फेमिली नामक समूहको जमघट कार्यक्रममा रामारोशन घुम्न पर्यटकहरु आइरहेको जनाइएको छ ।

त्यहाँ क्यानडा, पोल्यान्ड, अमेरिका, इटली, रसिया, स्विडेन, इजरायल, फ्रान्स, स्पेन, जर्मन, थाइल्यान्ड, जापान, भारतसहित ३५ भन्दा बढी देशका झण्डै ४ हजार पर्यटक रामारोशन जाँदैछन् । उनीहरु भारतीय नाका हुँदै त्यहाँ पुगेका हुन् । उनीहरु महिना दिनसम्म रामारोशन क्षेत्रमा बस्ने बताएका छन् । समुद्र सतहबाट करिब २५ सय मिटर उचाइमा रहेको रामारोशन क्षेत्र  ‘१२ बण्ड, १८ खण्ड’ का नामले परिचित छ । १२ वटा ताल र १८ वटा घाँसे मैदान रहेको सो क्षेत्र करिब ५–७ किलोमिटरमा फैलिएको छ । यहाँ डेढ किलोमिटर क्षेत्रफलमा फैलिएको जिंगाले ताल छ भने एउटै घाँसे मैदान ७ सय रोपनीमा फैलिएको छ।

सयौंको संख्यामा एकैपटक विदेशीले त्यता बस्दा सुरक्षा चुनौति, शौचालयको समस्या, वन्यजन्तुलाई हुने नोक्सानीको संभावना र फोहोरमैला व्यवस्थापनमा समस्या पर्ने देखिएको छ । 

उनीहरुको गतिविधि निगरानी राख्न प्रहरी र सशस्त्र प्रहरीको थप टोली परिचालन गरिने जिल्ला प्रशासन कार्यालय अछामले जनाएको छ । अवैध गतिविधि गर्नेलाई तत्काल नियन्त्रणमा लिन निर्देशन समेत दिइएको छ ।