प्रधानमन्त्री प्रचण्डको चीन भ्रमण टोलीमा को को छन् ?

४ असोज, काठमाडौं । प्रधानमन्त्री पुष्पकमल दाहाल  ‘प्रचण्ड’ अमेरिकाबाटै चीन भ्रमणमा जाने निश्चित भएका छन् । परराष्ट्र मन्त्रालयले औपचारिक भ्रमणको तालिका सार्वजनिक गरेको छ । जसअनुसार भ्रमण ८ दिनको हुनेछ । 

प्रधानमन्त्री प्रचण्ड असोज ६ देखि १३ सम्म चीनमा रहनेछन् । उनले ६ गते एसियाड गेमको उद्घाटन समारोहलाई सम्बोधन गर्नेछन् । त्यसपछि चिनियाँ राष्ट्रपति सी जिङ पिङ, समकक्षी ली छ्याङलगायत नेताहरुसँग भेटवार्ता गर्नेछन् । भ्रमणका बेला विद्युत व्यापार, बीआरआई अन्तर्गतका विभिन्न विकास शीर्षकमा दुई पक्षीय सम्झौता समेत हुनेछ ।

चीन भ्रमण टोलीमा प्रचण्ड पुत्री गंगा दाहाल, परराष्ट्रमन्त्री नारायण प्रकाश साउद, खानेपानी मन्त्री महिद्र राय यादव, भौतिक पूर्वाधार तथा यातायात मन्त्री प्रकाश ज्वाला, राष्ट्रिय सुरक्षा सल्लाहकार शङ्करदास बैरागी, राष्ट्रिय योजना आयोगका उपाध्यक्ष मीनबहादुर श्रेष्ठलगायत रहने छन् । 

यसअघिसम्म न्यूयोर्कबाट सिधै चीन जाने भनिएपनि औपचारिक घोषणा गरिसकेको थिए । संयुक्त राष्ट्र संघको ७८औं महासभामा भाग लिन नेपाली प्रतिनिमण्डलको नेतृत्व गर्दै गएको भदौ ३० मा प्रचण्ड अमेरिकाको न्यूयोर्क प्रस्थान गरेका थिए । उनले आज महासभामा नेपालको तर्फबाट सम्बोधन गर्दैछन् ।