शिक्षक आन्दोलन उग्रतर्फ, ब्यारिकेड फालेर निषेधित क्षेत्र प्रवेश गर्ने प्रयास

४ असोज, काठमाडौं । विद्यालय शिक्षासम्बन्धी विधेयकको विरोधमा उत्रिएका शिक्षकहरूको आन्दोलन उग्र तर्फ लागेको छ । बिहीबार दोस्रो दिन काठमाडौंको माइतीघरबाट जुलुस सुरु गरेर नयाँ बानेश्वरमा पुगेका शिक्षकले निषेधित क्षेत्रमा प्रवेश गर्न खोजेपछि केही समय बानेश्वर क्षेत्र तनाव ग्रस्त बन्यो । बिजुली बजारबाट आउने सबै मार्गमा बाक्लो संख्यामा परिचालित सुरक्षाकर्मीलाई पछाडि फर्काउने योजनामा उनीहरू लागेका छन् । 

निषेधित क्षेत्रमा प्रवेश हुन नदिन सडकमा तेर्स्याइएकाे ब्यारिकेड तोड्ने कोसिस शिक्षकहरूले गरिरहेका छन् । प्रहरीले माइकिङ गरेर निषेधित क्षेत्र प्रवेश गरिएको बल प्रयोग गर्न बाध्य हुने चेतावनी दिइरहेका छन् । ब्यारिकेड तान्न थालेपछि प्रहरी र शिक्षकबीच केही बेर धकेलाधकेल समेत भएका छन् । आन्दोलनको नेतृत्व गरिरहेको नेपाल शिक्षक महासंघले बुधबार संयम अपनाउन भनिए पनि आज आन्दोलनकारीहरुले ब्यारिकेड फाल्न खोज्दा समेत मौन बसेको छ । 

शिक्षा मन्त्री अशोक राईको राजीनामाको माग गर्दै सरकारविरुद्ध चर्का नाराबाजी लगाउँदै आन्दोलनकारी संसद भवनतर्फ अगाडि बढ्न खोजिरहेका छन् । सडक छेउछाउका बोटबिरुवा र दूबो नष्ट भएका छन् । बिरुवा उखेलेर प्रहरीमाथि प्रहार गरेका छन् ।

आन्दोलनको नेतृत्व गरिरहेको नेपाल शिक्षक महासंघले प्रधानमन्त्री वा विधेयक संशोधन गर्न सक्ने अख्तियार राख्ने पक्षसँग मात्र वार्तामा बस्ने अडान लिँदै प्रदर्शनलाई कडा बनाउँदै लगिरहेको छ । निषेधित क्षेत्रमा बाक्लो संख्यामा प्रहरी परिचालन गरिएको छ भने पानीको फोहोर हान्ने दमकल तैनाथ गरिएको छ । संसद भवन चारैतिर सुरक्षाकर्मी परिचालन गरिएको छ ।

यता गृहमन्त्री नारायणकाजी श्रेष्ठले संयमता अपनाउन आन्दोलनकारीहरुसँग आग्रह गरेका छन् । तर माग पूरा भएसम्म काठमाडौं नछाड्ने आन्दोलनकारीको अडान छ ।