‘सर्वोत्कृष्ट फिल्म’ घोषणा नगर्ने निर्णयविरुद्ध उच्च अदालतमा रिट दायर

४ असोज, काठमाडौं । राष्ट्रिय चलचित्र पुरस्कार–२०८०’ मा ‘सर्वोत्कृष्ट फिल्म’को घोषणा नगर्ने चलचित्र विकास बोर्डको निर्णयविरुद्ध चलचित्रकर्मीहरुले उच्च अदालत पाटनमा रिट निवेदन दायर गराएका छन् । निर्णयको सक्कल प्रति झिकाउने र निर्णय बदरको मागसहित परमादेशको माग गरिएको छ । 

फिल्म  ‘प्रकाश’का निर्देशन दिनेश राउत, लेखक विकास सुवेदी र जुम्लाका मीनराज आचार्य लगायतले बाेर्डलाई विपक्षी बनाइ रिट दायर गराएका हुन् । उच्चले दुवै पक्षलाई छलफलका लागि शुक्रबार बिहान बोलाएको छ । रिटमा सर्वोत्कृष्ट विधामा फिल्मलाई पुरस्कृत नगरिनुको कारण सार्वजनिक गरिनुपर्ने जिकिर छ । 

बोर्डको निर्णयअनुसार गएको भदौ १२ गते राष्ट्रपति कार्यालय शीतल निवासमा सर्वश्रेष्ठ फिल्म विधालाई छाडेर अन्य विधामा मात्र पुरस्कार वितरण गरिएको थियो ।