आन्दोलनरत शिक्षकहरुसँग वार्ता गर्ने जिम्मा उपप्रधानमन्त्री श्रेष्ठलाई

४ असोज, काठमाडौं । सरकारले देशभरका सामुदायिक विद्यालयका आन्दोलनरत शिक्षकहरुसँग वार्ता गर्ने जिम्मा उपप्रधान एवं गृहमन्त्री नारा नारायणकाजी श्रेष्ठलाई जिम्मेवारी दिएको छ ।

कार्यवाहक प्रधानमन्त्रीको समेत जिम्मेवारी सम्हालिरहेका रक्षामन्त्री पूर्णबहादुर खड्काले आन्दोलनरत शिक्षकहरूले शिक्षा मन्त्रीसँग वार्ता नगर्ने अडान लिएको उल्लेख गर्दै उपप्रधानमन्त्री तथा गृहमन्त्री नारायणकाजी श्रेष्ठलाई वार्ता गर्ने जिम्मा दिइएको जानकारी गराएका छन् । 

उनले शिक्षकहरुका समस्या समाधान गर्न सरकार तयार रहेको समेत बताए । नेपाली कांग्रेसको सानेपामा जारी केन्द्रीय बैठकमा शिक्षकहरुले शिक्षा विधेयकको विरोधमा काठमाडौंमा दुई दिनदेखि जारी राखेको आन्दोलनबारे सरकारको धारणा माग गरेपछि जवाफ दिँदै मन्त्री खडकाले सो कुरा बताएका हुन् । उनले मन्त्री श्रेष्ठले शिक्षकहरुसँग छलफल सुरु गरिसकेको बताए ।

विधेयकविरुद्ध १८ बुँदे माग राख्दै बुधबारदेखि देशभरका शिक्षकहरुले नेपाल शिक्षक महासंघ राष्ट्रिय समितिको नेतृत्वमा काठमाडौं आएर सडक आन्दोलन चलाइरहेका छन् ।

विधेयकलाई सरोकारवाला पक्षसँग छलफल नै नचलाई खुरुक्क संसदमा दर्ता गराएको भन्दै शिक्षामन्त्री अशोक राईको राजीनामा माग शिक्षकहरुले गरेका छन् ।