शिक्षकका जायज मागहरू सम्बोधन गर्न शिक्षा मन्त्रीलाई एमालेको ज्ञापनपत्र

४ असोज, काठमाडौं । प्रमुख प्रतिपक्षी दल नेकपा (एमाले)ले आन्दोलनरत शिक्षकहरुका जायज माग सम्बोधन गर्न शिक्षा, विज्ञान तथा प्रविधि मन्त्री अशोककुमार राईलाई ज्ञापनपत्र बुझाएको छ । बिहीबार एमाले संसदीय दलका सचेतक महेश बर्तौला नेतृत्वको टोलीले मन्त्री अशोककुमार राईलाई सिंहदरबारस्थित कार्यकक्षमा भेट गरी ज्ञापनपत्र बुझाएको हो । 

टोलीले आन्दोलनको नेतृत्व गरिरहेको शिक्षक महासंघका पदाधिकारीसँग वार्ता गरी समस्या समाधान गर्न र तत्काल विद्यालय संचालन गर्ने वातावरण तत्काल बनाउन मन्त्री राईसँग आग्रह गरेको सचेतक बर्तौलाले बताए । 

मन्त्री राईले गत बुधबार संसदमा दर्ता गराएको शिक्षा विधेयकको विरोधमा देशभरका सामुदायिक विद्यालयका हजारौं शिक्षकहरु अहिले काठमाडौं जम्मा भएर २ दिनदेखि सडक आन्दोलन गरिरहेका छन् । उनीहरु नेपाल शिक्षक महासंघको नेतृत्वमा १८ बुँदै माग राखेर आन्दोलन चलाइरहेका छन् । माग पूरा नभएसम्म काठमाडौं नछाड्ने अडान उनीहरुको छ ।

यसैबीच सरकारले शिक्षकहरुसँग वार्ता गर्ने जिम्मा उपप्रधान एवं गृहमन्त्री नारायणकाजी श्रेष्ठलाई आजै मात्र दिएको छ । आन्दोलनरत शिक्षकहरुले मन्त्री राईसँग वार्ता नगर्ने अडान नछाडेपछि कार्यवाहक प्रधानमन्त्री समेत रहेका रक्षामन्त्री पूर्णबहादुर खडकाले वार्ता गर्ने जिम्मा मन्त्री श्रेष्ठलाई दिएको जानकारी दिएका हुन् ।