शिक्षकहरुकाे आन्दोलन हिंसात्मक बन्न सक्ने भन्दै मानवअधिकार आयोगले गरायाे सचेत

४ असोज, काठमाडौं । राष्ट्रिय मानवअधिकार आयोगले बिहीबार एक प्रेस विज्ञप्ति निकालेर विद्यार्थीको पढ्न पाउने अधिकारप्रति संवेदनशील बन्न आन्दोलनरत शिक्षकहरुसँग आग्रह गरेको छ ।

आफ्ना मागहरु सम्बोधन गराउन विद्यालय नै बन्द गरी पठनपाठनमा अवरुद्ध गर्दा बालबालिकाको शान्तिपूर्ण वातावरणमा शिक्षा प्राप्त गर्ने अधिकारको उल्लंघन भएको आयोगको निष्कर्ष छ । विद्यालय बन्दले विद्यालय शान्ति क्षेत्र घोषणालाई समेत प्रत्यक्ष असर पर्न पुगेको आयोगको भनाइ छ । 

सरकारले ल्याएको विद्यालय शिक्षा विधेयकको विरोध देशभरका सामुदायिक विद्यालयका हजारौं शिक्षक विद्यालय बन्द गरेर काठमाडौंमा ३ दिनदेखि आन्दोलन चलाइरहेका छन् । आन्दोलनको नेतृत्व नेपाल शिक्षक महासंघले गरिरहेको छ ।

आफ्ना मागहरु पूरा गराउन विद्यालय बन्दबाहेकको विकल्प खोज्न र वार्ताको माध्यमबाट समस्याको समाधान निकाल्न समेत विज्ञप्तिमार्फत संवद्ध पक्षलाइ भनेको छ । आन्दोलनमा हिंसात्मक अवस्था सिर्जना हुनसक्ने तर्फ समेत सचेत गराइएको छ ।