दुवै पक्ष आन्तरिक तयारीमा लागेकाले सरकार र आन्दोलनरत शिक्षकबीचको वार्ता १२ बजे पछि सारियो

५ असोज, काठमाडौं । आन्दोलनरत शिक्षकहरूसँग शुक्रबार बिहान ८ बजे गर्ने भनिएको वार्ता चार घन्टा पर सरेको छ । असोज ३ गते देखी देशैभरीका शिक्षकहरूले काठमाडौं केन्द्रित आन्दोलन गरेपछि सरकारले उनीहरूलाई वार्तामा बोलाएको थियो । 

बिहिबार बिहान र राती भएको वार्ता निष्कर्षबिहिन भएपछि आज बिहान ८ बजेका लागि बोलाइएको थियो । तर, सो वार्ता अब १२ बजेपछि सिंहदरबारमा हुनेछ । शिक्षकहरूको मागका बारेमा सरकारले आन्तरिक छलफल गर्न अझै बाँकी रहेको भन्दै थप समय मागेपछि बार्ता १२ बजेपछिका लागि सारिएको हो । 

नेपाल शिक्षक महासंघका महासचिव लक्ष्मी किशोर सुवेदीको अनुसार यतिखेर सरकार र आन्दोलनरत शिक्षक दुवै आन्तरिक छलफलमा जुटेका छन । यसअघि कार्यवाहक प्रधानमन्त्री पूर्णबहादुर खड्कासहित, उपप्रधान तथा गृह मन्त्री नारायणकाजी श्रेष्ठ तथा कानून, न्याय तथा संसदीय मामिला मन्त्री धनराज गुरूङ, शिक्षा मन्त्री  अशोक राई लगायतले बिहान एक चरण आन्तरिक छलफल गरेका थिए । 

सो छलफल पूर्ण नभएपछि थप समय माग गरिएको हो । कानुन, न्याय तथा संसदीय मामिलामन्त्री धनराज गुरुङले पनि शिक्षकहरूका मागमा आज निष्कर्षमा पुग्ने दाबी गरेका छन् । आजको वार्तामा शिक्षकहरूको माग पूरा गर्ने गरी छलफल हुने र निष्कर्षमा पुगिने उनको भनाइ छ ।

शिक्षकहरूसँगको औपचारिक वार्ता सुरु हुनुअघि गृह, शिक्षा, सञ्चार र कानुन मन्त्रीहरूबीच भएको आन्तरिक छलफलमा सहभागी मन्त्री गुरुङले भने, ‘शिक्षक साथीहरूका मागमा हामीले बुँदागत रुपमा हिजोदेखि नै छलफल गरेका छौं । अब अन्तिम टुंगो लगाउने छौं । आज टुंगिन्छ ।’

मन्त्रीहरूको आन्तरिक छलफलपछि गृह मन्त्रालयमा शिक्षक प्रतिनिधिहरूसँग औपचारिक वार्ता सुरू हुने छ । यसअघि बिहीबार पनि २ पटक वार्ता भएपनि कुनै निष्कर्ष निस्किन सकेको थिएन । शिक्षकहरू विद्यालय बन्द गरेर बुधबारदेखि काठमाडौं केन्द्रित आन्दोलनमा छन् ।