प्रहरीसहित राजश्व टोलीले छापा मारे पछि सिरहाका व्यवसायी तनावमा

•मुकेश मुमार यादव

५ असोज, सिरहा । सिरहाको मिर्चैयामा राजश्व अनुसन्धान कार्यालय इटहरीको टोलीले एक कपडा पसलसहितको घरमा छापा मारेको छ । विशेष सूचनाको आधारमा आएको राजश्व अनुसन्धान कार्यालय इटहरीको टोलीले पसलसहितको घरमा छापा मार्ने क्रममा घरको चारैतिरबाट सशस्त्र प्रहरीले घेरेर बसेपछि स्थानीय व्यवसायी आतङ्कित बनेका छन् ।

बुधबार करिब ३ बजेको समयमा राजश्व अनुसन्धान कार्यालय इटहरीका प्रमुख कार्यालय प्रमुख सुरेश आचार्यको नेतृत्वमा आएको हतियार सहितको सशस्त्र प्रहरीले २० घण्टाभन्दा लामो समयदेखि मिर्चैया नगरपालिका ५ संस्था चौकमा रहेको कल्याण ट्रडेर्सको पसलसहितको घरमा चारैतिरबाट घेरा हाले पछि स्थानीय व्यवसायी आतङ्कित बनेका हुन ।

टोलीले पसल, गोदाम र घर खानतलासी गरिसकेर पनि हतियारसहितका प्रहरीले घर घेरेर बस्दा आफूहरू रातभरी सुत्न नसकेको व्यवसायी बताउँछन्। उनीहरूले अनुसन्धान टोलीले पसल, गोदाम, घरका प्रत्येक दराज देखी बच्चाहरूको झोलासमेत खोलेर हेरेका थिए ।  रातभर हतियारधारी प्रहरीको घेराबन्दीमा बस्नुपर्दा निकै नै तनाव भएको उनीहरूको गुनासाे छ ।

स्थानीय व्यवसायी तथा समाजसेवी अशोक साहले व्यवसायमा तलमाथि भएको भए आवश्यक कारबाही गर्दा हुन्छ तर पसलमा बम, बारुद राखेको जस्तो प्रहरीले घेरा हालेर बस्दा व्यवसायीहरुमा थप मानसिक तनाव भएको बताए । उनले भने,  ‘यो पसल यहाँकाे होलसेल व्यवसाय गर्छ ।' सो क्षेत्रका व्यवसायीलाई कपडा आपूर्ति गर्ने पसलमा प्रहरी लगाएर राजश्वले अनुसन्धान र खानतलासी गरे पछि  सिरहाका व्यवसायी आतंकित बनेको उनको भनाइ छ । 

व्यवसायी साहले भने, ‘व्यवसायीहरूले व्यापार गर्दा कुनै कसुर गरेको भए उनलाई दण्ड जरिवाना गर्दा हुन्छ तर व्यवसाय ठप्प भएर मानसिक तनाव खेपिरहेका व्यवसायीलाई यो व्यवहारले थप पीडा दिएको छ ।’

राजश्व अनुसन्धान कार्यालय इटहरीको टोलीले गोदाममा खानतलासी गरी विल विजक, भन्सारका प्रज्ञापन पत्र, खरिद बिक्री खाता लगायतका आवश्यक कागजात लिएर छापा मार्ने पसल तत्कालको लागि शिल गरिएको उधोग वाणिज्य संघ मिर्चैयाका महासचिव भरत महासेठले जनाए ।

इलाका प्रहरी कार्यालय मिर्चैयाका प्रमुख डीएसपी जितेन्द्र बस्नेतले राजश्व अनुसन्धान कार्यालय इटहरीले छापा मारेको र प्रहरीले निगरानी गरिरहेको विषयमा आफू जानकार भएपनि औपचारिक जानकारी नभएको बताए। यस सम्बन्धमा थप जानकारी लिन पुग्दा राजस्व अनुसन्धान कार्यालय इटहरीबाट खटिएको टोलीले सम्पर्कमा आउन चाहेनन्। कार्यालयमा फोन सम्पर्क गर्दा कार्यालयको फोन समेत उठेन।