छिन्नमस्ता मन्दिरमा पनि जलहरी काण्डकाे झल्काे, दाताकाे नाम लेखिएकाे नयाँ मूर्ति जडानले तनाव

५ असोज, काठमाडौं । सप्तरीको छिन्नमस्ता भगवती मन्दिरमा देवीको मन्दिरमा पुरानो चाँदीको मूर्ति (मुकुट) हटाएर नयाँ मुकुट राखेपछि विरोध सुरु भएको छ । एक किलो ५० ग्राम तौल भएको पुरानो मूर्ति झिकेर बिहीबार मन्दिरमा संरक्षण समितिले दाता परिवारका नाम नाम लेखिएको नयाँ मूर्ति जडान गरिएपछि स्थानीयले विरोध गरेका हुन् । नयाँ मूर्तिको तौल समेत २ सय ५० ग्राम रहेको पाइएको छ ।

समितिले आर्थिक प्रलोभनमा परी पुरानो मुकुट झिकेर दाताको नाम लेखिएको नयाँ मुकुट जडान गरेर श्रद्धालुको आस्थासँग खेलवाड गरेको भन्दै स्थानीयले चर्को विरोध गरेका हुन् । भगवतीको नयाँ मूर्तिमा कृष्ण मुरारी प्याकुरेल, गोपीराज प्याकुरेल, राधा प्याकुरेल र शंकर प्याकुरेल गरी ४ जनाको नाम कुँदिएको छ । 

छिन्नमस्ता गाउँपालिकाका अध्यक्ष विद्यानन्द चौधरीले नयाँ मूर्ति राखेको विषय आफूलाई थाहा नभएको बताए । स्थानीय र पालिकालाई जानकारी नदिइ एकतर्फी ढंगले समितिले मूर्ति परिवर्तन गर्नु व्यवहारिक नभएको उनको भनाइ । उनले गाउँपालिकाकै पहलमा पुरानो मूर्तिलाई शुक्रबार नै पुनःस्थापित गरिने बताए । 

मन्दिरका पीठाधीश महाकान्त ठाकुरले पुरानो मूर्तिमा चिरा परेका कारण दाता पक्षकै अनुरोधमा उनीहरुको नाम लेखेर नयाँ मूर्ति जडान गरिएको बताए । मन्दिरको पुरानो मन्दिर २०७८ साउन १७ गते राति चोरी भएको थियो । चोरी भएको भगवतीको चाँदीको मुकुट १२ घण्टापछि भेटिएको छ । चोरी घटनामा विष्णुपुर गाउँपालिका–५ मझाउ टोलका राजेश कुमार मण्डल पक्राउ परेका थिए । फेला पारिएको उक्त मूर्ति क्षमापूजासहित पुनःस्थापना गरिएको थियो । 

यसअघि पशुनाथको मन्दिरमा तत्काली एमाले अध्यक्ष केपी शर्मा ओलीको निर्देशनमा १०८ केजी सुनको जलहरीमा तत्कालीन राष्ट्रपति विद्यादेवी भण्डारी, प्रधानमन्त्री ओली, पर्यटनमन्त्री, पशुपति विकास कोषका सदस्य सचिव, जलहरीमा सुन दिएर सहयोग गर्ने दाता मिनबहादुर गुरुङलगायतको नाम कुँदिएको पाइएको थियो । सो विषय पछि जलहरी राख्दा कम तौलको राखेर करोडौं भ्रष्टाचार गरेको भी अख्तियारमा उजुरी परेपछि अनुसन्धानका क्रममा जलहरीको मुनिपट्टिको भागमा नाम लेखिएको फेला परेको थियो । पछि नाम मेटाएर तौल लिएर पुनः स्थापित गरिएको थियो । ताैलमा भने खासै कमी भेटिएन । उक्त घटनाका कारण एमालेमाथि बारम्बार जलहरी काण्ड र नामाकरण प्रकरणले आलोचना हुँदै अएको छ ।

यसपटक छिन्नमस्त मन्दिरमा पनि जलहरी काण्डकाे झल्काे दिने गरी मूर्ति काण्ड मच्चाइएकाे छ ।