विद्यालय बन्द गरेर शिक्षकहरु आन्दोलनका लागि सडकमा आउनु दुर्भाग्य हो, सरकार गम्भीर बनोस्ः नेता कोइराला

५ असोज, काठमाडौं । नेपाली कांग्रेसका वरिष्ठ नेता डा.शेखर कोइरालाले शिक्षकहरू विद्यालय बन्द गरेर आन्दोलन गर्न सडकमा आउनु दुर्भाग्य भएको भन्दै यसप्रति सरकार गम्भीर हुनुपर्ने बताएका छन् ।  उनले शिक्षकहरूले उठाएका मागहरु संवेदनशील रहेको र त्यसबारे सरकारलाई जिम्मेवार बनेर र तुरुन्तै समस्या समाधान गर्न लाग्नुपर्ने बताएका छन् ।  

शिक्षकहरूको जारी आन्दोलनका सन्दर्भमा शुक्रबार सामाजिक सञ्जाल फेसबुकमा आफ्नो धारणा राख्दै कोइरालाले दक्ष जनशक्ति उत्पादनमा तल्लो कक्षाबाटै राम्रो शिक्षा दिनुपर्ने बताएका छन् । उनले शिक्षक आन्दोलनमा आउनुका पछाडी धेरै कारण रहेको र सरकारले शिक्षा क्षेत्रमा देखिएका समस्यालाई यथाशिघ्र सम्बोधन गर्नुपर्ने बताएका छन् । 

उनले शिक्षकहरूका मागहरु केही व्यवहारिक, कानुनी र संवैधानिक रहेको बताएका छन् । दक्ष जनशक्ति उत्पादनमा तल्लो कक्षाबाटै राम्रो शिक्षा दिनुपर्ने भएपनि व्यवहारिक कारणले त्यसो हुन सकेको देखिएन भन्दै यस्ता मागहरु तुरुन्त सम्बोधन गर्न सरकारको ध्यानाकर्षण गराएका छन् । 

कानुनी रुपमा शिक्षा क्षेत्र सबल गराउन शिक्षकहरूको भूमिकाको उच्च मूल्यांकन गर्दै विधेयकमा आवश्यक प्रावधान समेटौं र यो आन्दोलन आजै सहमतिमा टुंग्याऔं भन्दै उनले सरकार र आन्दोलनरत शिक्षक वार्तामा बसेर चाडो निष्कर्षमा पुग्नुपर्ने बताएका छन् । 

कोइरालाले भनेका छन्, ‘शिक्षकहरूका मागहरु केही व्यवहारिक, कानूनी र संवैधानिक छन् । दक्ष जनशक्ति उत्पादनमा तल्लो कक्षाबाटै राम्रो शिक्षा दिनुपर्छ । ब्यवहारिक कारणले त्यसो हुन सकेको देखिन्न । यस्ता मागहरु तुरुन्त सम्बोधन गरौं । कानूनी रुपमा शिक्षा क्षेत्र सबल गराउन शिक्षकहरूको भूमिकाको उच्च मुल्यांकन गर्दै विधेयकमा आवश्यक प्रावधान समेटौं र यो आन्दोलन आजै सहमतिमा टुंग्याउँ ।’

उनले संघीय लोकतान्त्रिक गणतन्त्र स्थापनाका लागि अग्रमोर्चामा रहेका शिक्षकहरू आज विद्यालय बन्द गरेर आफ्नो अधिकारका लागि सडकमा आउन बाध्य हुनु दुर्भाग्य भएको र यस्ता संवेदनशील विषयमा सरकार जिम्मेवार बनेर  तुरुन्त समस्या समाधानतिर लाग्नुपर्ने बताएका छन् ।