आफ्ना सांसदहरुलाई राखेर कांग्रेसले आन्दोलनरत शिक्षकका माग र शिक्षा विधेयकबारे पार्टीको धारणा बनाउने

५ असोज, काठमाडौं । नेपाली कांग्रेसले आनेलनरत शिक्षकका माग र विद्यालय शिक्षा विधेयकबाट पार्टीको धारणा बनाउने भएको छ । यसबारे छलफल गर्न असोज ८ र ९ गते कांग्रेसले पार्टीका सांसदहरुको बैठक बोलाएको छ । बिद्यालय शिक्षा विधेयकविरुद्ध विभिन्न माग राखेर शिक्षकहरु आन्दोलनमा आएकाले विधेयकबारे पार्टीको एकीकृत धारणा बनाउन सांसदहरुको बैठक बोलाइएको हो । 

कांग्रेसका मुख्य सचेतक रमेश लेखकले संसदमा दर्ता भएका विधेयकहरु उपर निरन्तर छलफल गर्दै आएको र अहिले शिक्षा विधेयकका विषयमा पनि विभिन्न भनाइहरु आएकाले यसको अध्यायन गरेर पार्टीको धारणा सार्वजनिक गर्न पार्टीका सांसदहरुसँग छलफल गर्न लागिएको बताए । उनले असोज ८ र ९ गते विद्यालय शिक्षा विधेयकमा छलफल गर्न सांसदहरुलाई संससद भवन नयाँ वानेश्वर स्थित लोत्सेहलमा बोलाइएको बताए । 

शुक्रबार पार्टीको केन्द्रिय समितिको बैठकमा उनले केन्द्रिय सदस्यहरुलाई समेत विधेयकमाथिको छलफलमा आमन्त्रण गरेका छन् । लेखकका अनुसार विद्यालय शिक्षा विधेयक धेरै चासोको विषय भएकाले यसमा एकीकृत धारणा तय गर्नु आवश्यक रहेकाले पार्टीका केन्द्रिय सदस्यहरुलाई समेत विधेयकमाथिको छलफलमा आमन्त्रण गरिएको बताए ।  

शिक्षा विधेयक २०८० शिक्षा, विज्ञान तथा प्रविधि मन्त्री अशोक कुमार राईले गत भदौ २७ गते प्रतिनिधि सभामा दर्ता गरेका थिए । प्रस्तावित विधेयकमा असन्तुष्ट शिक्षकहरु आन्दोलनमा छन् । सरकारले आन्दोलनरत शिक्षकसँग वार्ताका लागि टोलीसमेत बनाएको छ । शुक्रबार निर्णयक वार्ता हुँदैछ ।