राष्ट्रसंघमा प्रधानमन्त्री प्रचण्डले गरे अमेरिकी राष्ट्रपति जो बाइडेनसँग भेटवार्ता

५ असोज, काठमाडौं । संयुक्त राष्ट्रसंघीय महासभामा सहभागी भएका प्रधानमन्त्री पुष्पकमल दाहाल ‘प्रचण्ड’ले अमेरिकी राष्ट्रपति जो बाइडेनसँग भेटर्ता गरेका छन् । बिहीबार राष्ट्रसंघको मुख्यालय अमेरिकाको न्युयोर्कमा साइड लाइन भेटवार्ता गरेका हुन् । 

भेटघाटपछि प्रचण्डको सचिवालयले उनीहरुबीचको सामूहिक तस्बिर सार्वजनिक गरेको छ । उक्त तस्बिरमा अमेरिकी फर्स्ट लेडीका रुपमा जिल ट्र्यासी जाकोब्स बाइडेन देखिएकी छन्। नेपालबाट फर्स्ट लेडीका रुपमा प्रचण्ड पुत्री गंगा दाहाल छिन् ।

प्रचण्डले शुक्रबार नै राष्ट्रसंघीय महासभालाई नेपालको तर्फबाट सम्बोधन गरेका छन् । उनले सम्बोधनमा नेपालको शान्ति प्रक्रिया निष्कर्षमा पुग्ने क्रममा रहेको जानकारी विश्वलाई गराएका थिए ।

यसअघि प्रम प्रचण्डले राष्ट्रसंघमा अल्पविकसित मुलुकको अध्यक्षका रुपमा पनि सम्बोधन गरेका थिए । प्रचण्डले राष्ट्रसंघीय महासभामा हुँदा विभिन्न देशका समकक्षीहरुसँग पनि साइड लाइन वार्ता गरेका थिए ।

उनी आजै न्युयोर्कबाट सिधै चीन भ्रमणमा जाँदैछन् । भोलि शनिबार हाङझाओमा हुने एसियाडको उद्घाटन सत्रमा सम्बोधन गर्नेछन् । त्यसपछि चिनियाँ राष्ट्रपति सी चिनफिङ, समकक्षीसँग भेट्ने कार्यतालिका छन् । भेटवार्ताका क्रममा दुई देशबीच नाका खोल्ने, उर्जा विस्तार तथा बीआरआईका विभिन्न परियोजनासम्बन्धी सम्झौता हुने बताइएको छ । उनी असोज १३ गते मात्र स्वदेश फर्कने कार्यक्रम तय छ ।