सिंहदरबार र नयाँ बानेश्वर क्षेत्रमा प्रदर्शन गर्ने २७ जना पक्राउ

५ असोज, काठमाडाैं । सिंहदरबार अगाडि प्रदर्शनमा उत्रिएका मोहन वैद्य किरण नेतृत्वको क्रान्तिकारी नेकपा निकट विद्यार्थी सङ्गठन अखिल क्रान्तिकारीका २७ जना  नेता–कार्यकर्तालाई प्रहरीले नियन्त्रणमा लिएको छ ।

    विद्यालय शिक्षा विधेयकको विरोधमा आज दिउँसो सिंहदबार र नयाँ बानेश्वर क्षेत्र अगाडि प्रदर्शनमा उत्रिएपछि उनीहरूलाई नियन्त्रणमा लिइएको जिल्ला प्रहरी परिसर काठमाडौंका प्रवक्ता तथा प्रहरी उपरीक्षक कुमोध ढुङ्गेलले राससलाई जानकारी दिए। 

उनका अनुसार पक्राउ पर्नेमा अखिल क्रान्तिकारीका संयोजक मिलन राईसहितका २७ जना रहेका र उनीहरुलाई अहिले सिंहदरबार वृत्तमा लगिएको छ । संसदमा प्रस्तुत शिक्षा विधेयकको खारेजी, देशलाई आवश्यक पर्ने दक्ष जनशक्तिको उत्पादन र त्यसका लागि शिक्षाको राष्ट्रियकरणको माग गर्दै विरोध प्रदर्शनमा सहभागी भएको अवस्थामा प्रहरीले नियन्त्रणमा लिएको जनाएकाे छ ।

निषेधित क्षेत्र तोड्दै सिंहदरबार गेटभित्र प्रवेश गरेपछि प्रहरी र आन्दोलनकारीबीच धकेला धकेल भएको छ । सो क्रममा प्रहरीले संचाकर्मीलाई समेत ज्याद्दती गरेको छ।  आन्दोलनको रिपोर्टिङ गर्न पुगेका सञ्चारकर्मीलाई दुर्व्यवहार र हातपातसमेत गरेको छ। सिंहदरबारभित्र वैद्य माओवादीका विद्यार्थीहरुलाई धरपकड गरिएको दृष्य खिच्ने क्रममा केही फोटो पत्रकारलाई समेत प्रहरीले हातपात गरेको छ ।