पद्मकन्या बहुमुखी क्याम्पसले मनायो ७३ औँ वार्षिकोत्सव

५ असोज, काठमाडौं । पद्मकन्या बहुमुखी क्याम्पसले आज ७३ औँ वार्षिकोत्सव मनाएको छ । आज यहाँ आयोजित कार्यक्रममा त्रिभुवन विश्वविद्यालयका शिक्षाध्यक्ष प्रा. डा. शिवलाल भुषालले सात दशकभन्दा पुरानो क्याम्पसको शैक्षिक गुणस्तरका लागि सरोकारवाला सबैले ध्यान दिनुपर्नेमा जोड दिए । 

“राज्यले शिक्षा क्षेत्रमा यथेष्ट बजेट छुट्याउन नसक्दा त्यसको मार विश्वविद्यालयमा परेको छ”, उनले भने, “विश्वविद्यालयका आवश्यकता परिपूर्तिका लागि हामी पाठ्यक्रमलाई बजारको आवश्यकतासँग जोड्ने गरी काम गरिरहेका छौँ ।” उनले क्याम्पसको शैक्षिक गुणस्तरवृद्धिका लागि सरोकारवाला सबैको सहकार्य जरुरी रहेको बताए । 

बागमती प्रदेशसभा सदस्य हरिप्रभा खड्गीले आफ्नो  विद्यार्थी जीवनको स्मण गर्दै पद्मकन्या बहुमुखी क्याम्पसले अध्ययनशील र जिम्मेवार नेतृत्व गर्न प्रेरणा दिएको बताए । उनले क्याम्पसको स्तरोन्नतिका लागि आफूले सक्दो पहल गर्ने प्रतिबद्धता समेत व्यक्त गरे । 

वार्षिकोत्सवका अवसरमा क्याम्पसले आजदेखि ई–लाईब्रेरी र निःशुल्क सेनिटरी प्याडको वितरण सुरु गरेको छ । क्याम्पस प्रमुख प्रा. डा. जयालक्ष्मी प्रधानले विद्यार्थी, शिक्षकका साथै कर्मचारीहरूलाई अध्ययन अनुसन्धान कार्यमा सहयोग पुर्याउनका लागि ई–लाइब्रेरी सुरु गरिएको बताए । महिला जागरण र सशक्तीकरणका लागि स्थापना भएको क्याम्पसले शैक्षिक र प्राज्ञिक गतिविधिमा सफलता हासिल गर्दै आएको उनको भनाइ छ । 
    
उनले भने, “यहाँबाट उत्पादित जनशक्तिलाई राष्ट्रिय तथा अन्तर्राष्ट्रिय बजारमा प्रतिस्पर्धी बनाउनका लागि शैक्षिक गुणस्तर थप अभिवृद्धि गर्दै लैजानु आजको प्रमुख चुनौती हो ।”

क्याम्पस प्रमुख प्रधानले शैक्षिक तथा प्रशासनिक कार्यलाई चुस्तदुस्त बनाउँदै अघि बढ्ने प्रतिबद्धता व्यक्त गरे । यसै शैक्षिक सत्रदेखि स्नातकोत्तर तहमा एमसीए र फेसन डिजाइनिङ कार्यक्रम थप गरिएको बताए ।