कांग्रेस महासमिति बैठक मधेशमा गर्न प्रस्ताव

५ असोज, काठमाडौं । नेपाली कांग्रेसका केन्द्रीय सदस्यहरूले पार्टीको महासमिति बैठक मधेश प्रदेशमा गर्न प्रस्ताव गरेका छन् । कांग्रेसले यसअघि साउनमा बसेको बैठकबाटै आगामी मंसिर ११ देखि १३ गतेसम्म महासमिति बैठक बोलाउने निर्णय गरेको थियो । बिहीबारदेखि जारी केन्द्रीय कार्यसमितिको बैठकमा महासमिति बैठकको तयारीबारे छलफल भइरहेको छ ।

महामन्त्री गगन थापाले महासमिति बैठकको तयारीका लागि विभिन्न उपसमिति गठन सहितको प्रस्ताव पेस गरेपछि महासमिति बैठक मधेशमा गर्न केन्द्रीय सदस्यहरूले प्रस्ताव गरेका हुन् । शुक्रबारको बैठकमा केन्द्रीय सदस्य मधु आचार्यले महासमिति बैठक मधेश प्रदेशमा गर्नु उपयुक्त हुने बताए । उनले पार्टीको महाधिवेशनपछिको अर्को महत्वपूर्ण सभा महासमिति भएकाले अहिलेको परिस्थितिअनुसार यसको बैठक ग्राउन्डमा गर्नु राम्रो हुने बताए । 

केन्द्रीय सदस्य गोविन्द पोखरेलले पनि महासमिति बैठक मोफसलमा गर्नु नै उपयुक्त हुने बताए । पार्टीको महाधिवेशन काठमाडौँमा भयो, अब महासमिति बैठक काठमाडौं उपत्यका बाहिर हुनु राम्रो हुन्छ,’ उनले भने, ’त्यसकारण मधेशमा गर्नुपर्छ भन्ने कुरा उठेको छ, त्यो उपयुक्त हुनसक्छ । 

कांग्रेसले संसदमा दर्ता भएको विधेयकलाई सर्व स्वीकार्य हुने संशोधन गर्ने प्रतिवद्धता पनि जनाएको छ । शिक्षा विधेयक विरुद्ध शिक्षक महासंघले गरेको तेस्रो दिनको आन्दोलन चलिरहँदा कांग्रेसले केन्द्रीय समितिको निर्णयबाट सरोकारवालालाई परिमार्जन गर्ने आश्वस्त पारेको छ । विद्यालय शिक्षाको गुणस्तर अभिवृद्धि गर्ने लगायतमा संविधानको मर्मलाई आत्मसाथ गर्न नसकेको कांग्रेसको ठहर छ । पार्टी बैठककै बीचमा शिक्षक महासंघको आन्दोलनप्रति चासो देखाउँदै कांग्रेसले केन्द्रीय समितिको बैठक सकिनु अघि नै उक्त विषयमा निर्णय सार्वजनिक गरेको छ ।