सल्यानमा जलेर आमा र छाेरीको हत्या प्रकरणः पूर्वप्रेमीले पेट्रोल छर्केर आगाे लगाएको खुलासा

५ असोज, काठमाडौं । गएको भदौ ३० गते राति सल्यानको त्रिवेणी गाउँपालिका–२ झालेढुंगास्थित थापा टोलमा घरभित्रै जलेर आमा र नवजात शिशु (छोरी)को मुत्यु भव्यतव्य नभई हत्याबाट भएको खुलेको छ । 

स्थानीय सुकलालकी श्रीमती २९ वर्षीया रेवती थापा र उनकी छोरी ९ महिनाकी रितु थापाको टिनको भुँइतले घरभित्र जलेको अवस्थामा मृत फेला परेका थिए । बिहान अबेरसम्म सुनसान पाइएपछि स्थानीयले ढोकाबाट हेर्दा आमा–छोरी जलेको अवस्थामा देखेर प्रहरीलाई खबर गरेका थिए । 

त्यसपछि इलाका प्रहरी कार्यालय लुहाम सल्यानले शवको मुचुल्का बनाए उठाएर पोष्टमार्टमा पठाएको थियो । घटनामा जिल्ला प्रहरी कार्यालयका एक डीएसपीको नेतृत्वमा सुक्ष्म अनुसन्धान गर्ने क्रममा हत्यामा रेवतीको पूर्व प्रेमी सिद्धकुमाख गाउँपालिका–२, खानिगाउँमा २८ वर्षीय कर्णबहादुर बस्नेतको संलग्नता रहेको खुलेको हो ।

उनलाई प्रहरीले बुधबार पक्राउ गरी हिरासत राखेर थप अनुसन्धान जारी राखेको छ । विवाहित बस्नेतले सुकलालसँग विवाह गरेको रिस साध्न भदौ २६ गते विदेशबाट घर आएर उनले योजना बनाएर २९  गते राति साढे ९ बजेतिर घरभित्र आमा छोरा मात्र भएका बेला प्रवेश गरी हत्या गरेको अनुसन्धानमा खुलेको प्रहरीको भनाइ छ । बस्नेत ढकढक गरेर ढोका खोल्न लगाइ घरभित्र छिरेर रेवतीलाई घाँटी न्याकेर ज्यान लिएपछि साथमा लिएर गएको पेट्रोल आमाछोरीको शरीरमा छर्केर सलाइले आगो लगाइ फरार भएका थिए ।

घटनाबारे रेवतीको मोवाइलको विस्तृत अनुसन्धान र अध्यायनबाट बस्नेतको कर्तुत खुलासा भएको हो । बस्नेत र रेवतीबीच झण्डै ७ वर्ष पुरानो प्रेम सम्बन्ध रहेको र आफू विवाहित भएकै बखत उनले रेवतीसँग विवाह गर्ने जिद्धी लिएको देखिएको छ । तर उनी बिचमा रोजगारका लागि दुबई जाँदा रेवतीको विवाह सुकलालसँग भएपछि बदलाभाव लिएको पाइएको प्रहरीको दाबी छ ।

दुबई जानुपहिले दुवै जनाबीच शारीरिक सम्बन्ध भएको प्रमाण समेत फेला परेको दाबी प्रहरीको छ । आरोपी बस्नेतले आमा–छोरीको हत्या आफूले गरेको कुरा प्रहरीसमक्ष स्वीकार गरेका छन् ।