सरकारसँगको सहमतिमा राहत शिक्षकको असहमति

५ असोज, काठमाडौं । सरकार र आन्दोलनरत शिक्षकबीच आज बेलुका सिंहदरबारमा भएको ६ सहमतिमा राहत शिक्षकहरूले असहमति जनाएका छन् ।

आजको सहमति सरकार र नेपाल शिक्षक महासंघबीच भएको र त्यसमा आफूहरूको असहमति रहेको राहत शिक्षक केन्द्रीय समितिका अध्यक्ष खेमराज अधिकारीले बताए । 

सहमति पत्रमा राहत शिक्षकको तर्फबाट हस्ताक्षर नगरिने उनले बताए । उनले सहमतिबारे असहमति जनाउन विज्ञप्ति निकाल्ने तयारीमा आफूहरू रहेको बताए । आजको सहमतिका बुँदाले राहत शिक्षकको माग सम्बोधन नगरेको उनको भनाइ छ ।

सरकारले संसदमा दर्ता गराएको विद्यालय शिक्षा विधेयकमा समेटिएका विभिन्न प्रावधान संशोधनको माग गर्दै बुधबारदेखि देशभरका सामुदायिक विद्यालयका स्थायी, अस्थायी, राहत, करार, अनुदान र बाल शिक्षक र कर्मचारीहरू काठमाडौंमा आन्दोलन गर्दै आइरहेका छन् ।

यस बीचमा आन्दोलनको नेतृत्व गरिरहेको नेपाल शिक्षक महासंघको वार्ता टोली र सरकारका टोलीबीच वार्ता हुँदा ६ बुँदे सहमति भएको छ । सहमति पत्रमा हस्ताक्षर भएकाे छ । सहमतिपश्चात आन्दोलनकारी शिक्षकहरूबीच फाटाे देखा परेकाे छ ।