सुन काण्ड छानबिन गर्न उच्चस्तरीय आयोग गठनबारे गृहमन्त्रीद्वारा एमालेसँग छलफल

५ असोज, काठमाडौं । काण्ड जाँचबुझ गर्न उच्चस्तरीय छानबिन समिति बनाउनेबारे उपप्रधान तथा गृहमन्त्री नारायणकाजी श्रेष्ठले प्रमुख प्रतिपक्षी दल एमालेसँग छलफल गरेका छन् ।

गृह मन्त्रालयमा भइरहेको छलफलमा एमाले, माओवादी केन्द्रका प्रमुख सचेतक र सचेतकहरू सहभागी भएका छन् ।  बैठकमा नेतृत्व, सदस्य संख्या तथा क्षेत्राधिकार लगायत विषयमा छलफल भइरहेकाे बताइएकाे छ । 

यसअघिका सहमति अनु्सार आयोग  असोज ५ मा अर्थात आजै घोषणा हुनुपर्ने थियो । तर गठन प्रक्रियासमेत सुरु नभएपछि दलका नेताहरुले आजै गठन हुनुपर्नेमा जोड दिँदै अभिव्यक्ति दिइरहेका छन् । एमाले अध्यक्ष केपी अाेलीले आजै मात्र आयाेग गठनबारे सरकाले बेवास्ता गरेकाे आराेप लगाएका छन् ।

सबैखाले सुन तस्करी प्रकरणमाथि छानबिन गर्न आयोग गठनको माग गर्दै एमालेले लामो समय संसदको दुवै सदन अवरुद्ध पारेपछि भदौ ६ गते प्रधानमन्त्री प्रचण्डले सर्वदलीय बैठक राखेर छलफल गराउँदा सुन काण्डहरू छानबिन गर्न असोज ५ गतेभित्र उच्चस्तरीय समिति बनाउने सहमति भएको थियाे । प्रधानमन्त्री प्रचण्ड हाल देशबाहिर छन् ।

खैर, साउन २ मा भन्सार विभागले सिनामंगलबाट बरामद गरेको ६० केजी सुन काण्डबारे अनुसन्धान सकेर सीआईबीले दिएको प्रतिवेदनका आधारमा ७ चिनियाँसहित २९ जनाविरुद्ध जिल्ला सरकारी वकिलको कार्यालयले जिल्ला अदालत काठमाडौंंमा मुद्दा चलाइसकेको छ । अदालतमा प्रतिवादीहरुको बयान लिने सिलसिला चलिरहेको छ । प्रकरणमा ९ चिनियाँसहित १८ जना फरार छन् ।

यो पनि पढ्नुहोस