साता लामो आयरल्याण्ड भ्रमणबाट फर्किए सभामुख

७ असोज, काठमाडौं । प्रतिनिधिसभा सभामुख देवराज घिमिरे आयरल्याण्डको साता लामो भ्रमण सकेर आइतबार स्वदेश फर्किएका छन् । त्रिभुवन अन्तर्राष्ट्रिय विमानस्थलको विशिष्ट कक्षमा आयोजित पत्रकार सम्मेलनमा उनले भ्रमण सफल भएको दाबी गरे ।

आयरल्याण्डमा रहँदा त्यहाँका राष्ट्रपति, माथिल्लो सदनका अध्यक्ष, तल्लो सदनका सभामुख, शिक्षा मामिला हेर्ने राज्यमन्त्री लगायतसँग भेटवार्ता गरेको जानकारी दिए ।

भेटका क्रममा आफूले नेपाली विद्यार्थीका लागि सहज भिसा तथा छात्रवृत्तिको व्यवस्था, क्यान्सर लगायतका रोगको उपचारमा सहयोग तथा नेपालका हिमाल आरोहण लगायतका विषयमा छलफल गरेको बताए ।

नेपालमा आइरिस लगानी भित्र्याउनेबारेमा र जलवायु परिवर्तन लगायत विषयमा विश्व मञ्चमा साझा सहकार्य गर्नेबारेमा पनि छलफल भएकाे उनले बताए । उनी भदौ ३१ गते आयरल्याण्ड गएका थिए ।