प्रधानमन्त्री प्रचण्डविरुद्धको अवहेलना मुद्दा सुनुवाइका लागि सर्वोच्चको संयुक्त इजलासमा पेसी

७ असोज, काठमाडौं । प्रधानमन्त्री पुष्पकमल दाहाल ‘प्रचण्ड’ विरुद्धको अवहेलना मुद्दा सर्वोच्च अदालतमा सुनुवाइका लागि संयुक्त इजलासमा पेसी तोकिएको छ ।

वरिष्ठ अधिवक्ता दिनेश त्रिपाठीले २०७३ जेठ १२ मा दर्ता गराएको अदालतको अवहेलना मुद्दा आइतबार सुनुवाइका लागि न्यायाधीशद्वय ईश्वरप्रसाद खतिवडा र कुमार रेग्मीको संयुक्त इजलासमा  पेसी तोकिएको छ । 

नेकपा माओवादी केन्द्रका अध्यक्ष समेत रहेका प्रचण्डले द्वन्द्वकालीन मुद्दाका विषयमा अदालतको फैसलालाई लिएर गरेको टिप्पणीपछि वरिष्ठ अधिवक्ता त्रिपाठीले अवहेलनाको मुद्दा दर्ता गराएका थिए । उक्त मुद्दमा पेसी चढ्ने अनि सुनुवाइ नहुने हुँदै आएको थियो । आज भने सुनुवाइ क्रमको दोस्रो नम्बरमा पेसी परेको छ ।

प्रधानमन्त्री प्रचण्ड हाल मित्रराष्ट्र चीनको भ्रमणमा छन् । उनी गएको भदौ ३० मा संयुक्त राष्ट्र संघको महासभालाई सम्बोधन गर्न अमेरिकाको न्यूयोर्क पुगेका थिए । त्यसपछि उतैबाटअसोज ५ गते चीन भ्रमण गएका हुन् । उनी असाेज १३ गते मात्र स्देश फर्किनेछन् ।

यसअघि भएको अल्पकालीन आदेशबमोजिम प्रचण्डले सर्वोच्चमा लिखित जवाफ पेस गरिसकेका छन् । उनले आफूले अदालतको अपहेलना नगरेको जिकिरसहित मुद्दा खारेज हुनुपर्ने दाबी पेस गरेका छन् ।