सुन तस्करी प्रकरणमा उच्चस्तरीय आयोग गठनबारे दलहरुबीच पुनः छलफल हुँदै

७ असोज, काठमाडौं । बहुचर्चित ६० किलो सुन तस्करी प्रकरणमाथि छानबिन आयोग गठन गर्ने बारे छलफल गर्न सत्ता पक्ष र प्रतिपक्षी दलहरू पुनः छलफलमा बस्ने भएका छन् । शुक्रबार भएको छलफल निष्कर्षमा पुग्न नसकेपछि पुनः छलफल गर्न बैठक बस्न लागेका हुन् । 

प्रमुख प्रतिपक्षी एमालेले ६० केजीसहित भेप प्रकरणको ९ केजी माथि पनि छानबिन हुनुपर्ने अडान राख्दै आएको छ । सरकार पक्ष भने ६० केजी सुन प्रकरणमाथि मात्र छानबिन गर्न अख्तियार दिने गरी आयोग बनाउने पक्षमा छ । छलफल गर्न दिउँसो २ बजे गृह मन्त्रालयमा बैठक बस्ने भएको एमालेका सचेतक महेश बर्ताैलाले बताए ।

यसअघिका सहमति अनुसार यही असोज ५ गते नै आयोग गठन भई घोषणा हुनुपर्ने थियो । तर  सत्तापक्ष र प्रतिपक्षी दल आ-आफ्नै अडानमा रहेका कारण आयोग गठन हुन सकेको छैन । आजको बैठकमा आयोगको नेतृत्व र क्षेत्राधिकारबारे छलफल हुने उनले बताए । आयोग गठनको पहल सरकारका तर्फबाट उपप्रधान एवं गृहमन्त्री नारायणकाजी श्रेष्ठले लिइरहेका छन् । 

६० केपी सुन तस्करी प्रकरणमा सरकारले सीआईबीमार्फत अनुसन्धान गराई जिल्ला अदालतमा ७ चिनियाँसहित २९ जनाविरुद्ध भन्सार छली, अवैध सामान ओसारपसार, संगठित अपराधलगायत ७ कसुरमा काठमाडौंं जिल्ला अदालतमा मुद्दा चलाइसकेको छ । अहिले थुनामा रहेका अभियुक्तहरूको अदालतमा बयान चलिरहेको छ । नाै जना विदेशीसहित १२ जना फरार सस्चीमा राखेर सीआईबीले खोजी जारी राखेको छ ।

गत साउन २ मा त्रिभुवन अन्तर्राष्ट्रिय विमानस्थलको भन्सार छलेर १ सय ५५ केजी वजनको ब्रेकसुहरूमा लुकाएर कार्टुनमा राखेर तस्करी भएको पहेँलाे धातु ३ गते सिनामंगलबाट भन्सार विभागले नियन्त्रणमा लिई सीआईबीलाई अनुसन्धान गर्न दिँदा सीआईबीकाे राेहबरमा राष्ट्र बैंककाे टक्सर विभागले बरामद ब्रेकसु पगाल्दा ६० केजी ७१६ ग्राम ससन ठहरिएको थियो । यसपछि आरोपी प्रतिवादीहरुविरुद्ध ३ अर्ब भन्दा बढी बिगो र कैद सजायको मागदाबीसहित मुद्दा चलाइएको छ ।