असम्बन्धित विषयको छलफलमा आकस्मिक बोलाएको भन्दै राज्य व्यवस्था समितिमा आक्रोशित भए गृहमन्त्री श्रेष्ठ

७ असोज, काठमाडौं । उपप्रधानमन्त्री तथा गृहमन्त्री नारायणकाजी श्रेष्ठले राज्य व्यवस्था समितिको बैठकमा आक्रोस देखाएका छन् । उनले आफूसँग असम्बन्धित विषयका छलफलमा आकस्मिक रुपमा बोलाएको भन्दै असन्तुष्टि पोखेका हुन् । समितिले अख्तियार दुरुपयोग ऐनलाई संशोधन गर्न बनेको विधेयकबारे छलफल गर्न समितिको बैठक बोलाइएको थियो । त्यो बैठकमा राखिएको विषय आफूसँग असम्बन्धित रहेको श्रेष्ठले बताए ।

  

केही सांसदले अख्तियार दुरुपयोग अनुसन्धान आयोग सम्बन्धी ऐनलाई संशोधन गर्न बनेको विधेयकमाथि छलफल गृहमन्त्री बिना चलाउन नदिने बताएपछि समितिका सभापति रामहरि खतिवडाले आकस्मिक रूपमा मन्त्री श्रेष्ठलाई समितिमा बोलाएका थिए । प्रधानमन्त्री तथा मन्त्रिपरिषदको कार्यालयले प्रस्तुत गरेको विधेयकमाथिको छलफलमा आफू असम्बन्धित भएको र आउनै पर्ने भनेर ताकेता गरिएको भन्दै उनले असन्तुष्टि पोखे । 

गृहमन्त्री श्रेष्ठले भने, ‘सभापतिजीले तपाई नआइकन सांसदले बैठक नै चल्न दिएनन भन्नुभयो भनेर बोलाउनु भयो । सदासयता देखाएर मात्र आफू आएको हुँ । म संसदलाई सम्मान गर्छु, संसदीय समितिलाई सम्मान गर्छु, तर लोकतान्त्रिक मूल्य मान्यता, त पनि त हुँदो हो नि ! हामी पद्दतिमा चल्नु पर्‍याे । यसरी जे मन लाग्यो त्यो गर्नु भएन ा बरु संसदमा जस्तै प्रश्नोत्तर राख्नुस् । ‘म आएको बेलामा सधैं यसरी प्रश्न गर्ने हो भने संसदमा जस्तै गृहमन्त्रीसँग प्रश्नोत्तर राखि दिनुहोस् न समितिमा पनि । म आइहाल्छु नि ।’ 
 
सांसदहरुले प्रश्न सोधपछि गृहमन्त्री श्रेष्ठले सर्लाहीको मलंगवामा भएको धार्मिक दंगा रोक्न गृह मन्त्रालयले गृहकार्य गरिरहेको बताए । बैठकमा आकस्मिक रूपमा बोलाइएका मन्त्री श्रेष्ठले सर्लाहीमा के भएको हो र  गृह मन्त्रालयले त्यहाँ के गर्नुपर्ने हो भन्ने बारेमा गृहकार्य गरिरहेको जानकारी गराए । केही समय यता नेपालको बहुजातीय बहुसांस्कृतिक एकतामा खलल पार्ने काम भइरहेको बताउँदै त्यसलाई रोक्न मन्त्रालय लागिपरेको उनले बताए । 

उनले धार्मिक साम्प्रदायिकता रोक्नका लागि विभिन्न धर्मका धर्म गुरुहरू बोलाएर बहुधार्मिक बैठक पनि बोलाएर धार्मिक सद्‌भाव कायम गर्न विज्ञप्ति पनि निकालेको बताए । बैठकमा एमाले सांसद रघुजी पन्तले तराईका जिल्लामा धार्मिक दंगाको खतरा रहेको, सर्लाहीको मलंगवामा हिन्दु मुस्लिम द्वन्द्व बढेको, हिन्दूको घरमा घुसेर आक्रमण भएको भन्दै बैठकमा गृहमन्त्रीलाई बोलाउन आग्रह गरेका थिए । 

उनले प्रधानमन्त्रीको दवावमा माओवादीबाट नेपाली सेनामा प्रवेश गरेका यमबहादुर अधिकारीको पदावधि ३ वर्ष समय थप गरिएको कुरामाथि पनि प्रश्न उठाए ।  यस्तै संखुुवासभामा भारतीय कम्पनी सतलजले २१ दिनसम्म काम गर्न नपाएपछि नेपाल सरकारसँग क्षतिपूर्ति मागेको बताउँदै नेपाललाई १ अर्व ६८ करोड रूपैयाँ  घाटा लगाउन खोजेको बताए । 

यस्तै सांसद रवि लामिछानेले सर्लाहीमा साम्प्रदायिक घटना बढ्न लागेको भनेर गृहमन्त्रीको ध्यानाकर्षण गराए । उनले सुन तस्करी प्रकरणमा अनुसन्धानमा अत्यन्तै आशा अपेक्षा गरे पनि भद्दा मजाक गरेको बताए । सत्तारूढ दलका नेताको नाम आएपछि बम झैँ पड्केला भनेको तर पटाकाजस्तो पनि नभएको टिप्पणी गरे । उनले सुन प्रकरणमा जोडिएका सत्तारूढ दलका नेताले सिआईबीमा अनुसन्धानका क्रममा प्रयोग गरेको मोबाइल नलगी अर्को मोबाइल लगेको अवस्था रहेको बताए । 

सत्तारूढ दलका नेताको नाम आउँदा समेत उनीहरूमाथि सामान्य सोधपुछ समेत नभएकोले गृहमन्त्रीमाथि राजनीतिक दलले हस्तक्षेप भएको हो कि के हो ? भन्दै उनले प्रश्न गरे । अर्का सांसद सर्वेन्द्रनाथ शुक्लाले सर्लाही लगायत तराईका जिल्लामा साम्प्रदायिक हिंसा बढेको, त्यस सम्बन्धी भिडियो भाइरल भएको बताए । गए राति २ घर जलाएको उल्लेख गर्दै उनले १०–१५ दिनको घटनामा पनि प्रहरी प्रशासनले केही नगरेको प्रति गृहमन्त्रीको ध्यानाकर्षण गराए । 

सांसद राजेन्द्र राईले १ अर्ब लागतमा बन्ने भनेको धनकुटाको कारागार कहिले बन्छ ? भन्दै प्रश्न गरे ? कोशी करिडोरमा एउटा पनि प्रहरी चौकी नभएको प्रति उनले गृहमन्त्रीको ध्यानाकर्षण गराए । जवाफमा गृहमन्त्री श्रेष्ठले सर्लाही घटनाबारे गृह मन्त्रालयले २ दिनभित्रै कारबाही प्रक्रिया अघि बढाउने जानकारी गराए ।

सर्लाही, पर्सा लगायतका जिल्लामा पछिल्लो दिनमा भइरहेका साम्प्रदायिक घटनाबारे सरकार गम्भीर रहेको र त्यहाँ चिन्ताजनाक घटना भइरहेको गृहमन्त्रीको भनाइ थियो । आइतबार बिहान सर्लाहीका प्रमुख जिल्ला अधिकारी र प्रहरी प्रमुखसहितको सहभागितामा बैठक बसेको र त्यसमाथि सरकारले गम्भीरतापूर्वक लिइरहेको गृहमन्त्रीको भनाइ थियो । ’प्रशासनिक रूपमा निर्णय गर्न पनि गम्भीर छौं । यी घटनाबारे गम्भीर छौं, दृढ भएर जान्छौं,’ उनले भने ।

सुरुमा प्रशासनिक निर्णय गर्दा समस्या हुन्छ कि भनेर कुरेको तर अब भने प्रशासनिक निर्णय गर्ने विषयमा छलफल भइरहेको उनको भनाइ थियो । नेपाल बहुजातीय, बहुसांस्कृतिक, बहुधार्मिक मुलुक भएको तर त्यसमा आँच पुर्याउने र खलल पार्ने कार्य भइरहेको भन्दै त्यसप्रति सरकार गम्भीर रहेको उनको भनाइ थियो ।

कोसी प्रदेशमा पनि सुरक्षा संवेदनशीलता रहेको गृहमन्त्री श्रेष्ठको भनाइ थियो । उनले सुरक्षा संवेदनशीलता बुझ्नका लागि आइतबार कोशी प्रदेश जान लागेको जानकारी दिए । यसअघि राज्यव्यवस्था तथा सुशासन समितिको बैठकमा नेपाल प्रहरीका महानिरीक्षक बसन्त कुँवर र सशस्त्र प्रहरीका महानिरीक्षक राजु अर्यालले पनि मधेस प्रदेशलगायतमा साम्प्रदायिक सद्‌भावमा खलल पारेर सुरक्षा चुनौती थप्ने कार्य भइरहेको बताएका थिए । कोसी प्रदेशमा पनि पहिचानका मुद्दाले समस्या ल्याएको बताएका थिए ।