हत्यापछि हात छिनाएर लैजाने ज्यान मुद्दाका दोषी ३४ पछि पक्राउ

७ असोज, काठमाडौं । भोजपुरमा एक व्यक्ति हत्यापछि हात समेत छिनाएर लगेको ज्यान मुद्दाका फरार प्रतिवादी ३४ वर्षपछि पक्राउ परेका छन् । लामो समय भारतमा लुकेर बसेका उनी घटना सामसुम भएको ठानेर नेपाल आएका बेला विशेष सूचनाका आधारमा प्रहरीले शनिबार पक्राउ गरेकाे हाेा ।

पक्राउ पर्नेमा जिल्लाको साल्पासिलिछो गाउँपालिका–५ का ६७ वर्षीय चक्रबहादुर राई रहेका छन् । उनी वरदात (हया)का बेला ३३ वर्षका थिए । हाल उनी ६७ वर्षका भएका छन् । उनले उनले २०४६ कात्तिक १७ गते स्थानीय २७ वर्षीय बद्रीकुमार राईको खुकुरी प्रहार गरी हत्या गरेका थिए । हत्यापछि उनीहरुले दायाँ हात छिनाएर लगेका पाइएको थियो ।

हत्यापछि मृतका परिवारले राईसहित ४ जनाविरुद्ध कर्तव्य ज्यान कसुरमा अनुसन्धान गर्न प्रहरीमा उजुरी दिएका थिए । तर उनीहरु सबै फरार थिए । उजुरीका आधारमा अनुसन्धान सकेर जिल्ला अदालतमा चलाइएको मुद्दामा २०६० जेठ २७ मा जिल्ला अदालतबाट उनीहरूलाई सर्वस्वसहित जन्म कैद सजायको फैसला भएको थियो । 

उनी फरार रहेकै अवस्थामा उनका परिवार बसाइ सरेर सुनसरीस्थित इटहरी उपमहानगरपालिका–२० तरहरामा बस्दै आएका थिए । त्यसैबीच चक्रबहादुर पनि घटना सेलाएको हुनसक्ने ठानेर परिवारसँगै आई बसेर बुंगुर पालन समेत गर्दै आइरहेका बेला पक्राउ परेका हुन् । उनलाई आइतबार नै प्रहरीले पत्रकार सम्मेलन गरी सार्वजनिक गरेको छ । फैसला कार्यान्वयनका लागि उनीलाई अदालतमा पेस गरिएको छ । उनलाई अझै चलान गरिने भएको छ ।