पूर्वराजा पुनः फिल्डमा, आइतबार भक्तपुर पुगे

७ असोज, काठमाडौं । देशभित्र राजसंस्थाको पुनःस्थापनाबारे राप्रपा, राप्रपा नेपाल लगायत विभिन्न संघसंस्थाहरुले आवाज उठाइरहेका बेला पूर्वराजा ज्ञानेन्द्र शाह जिल्ला भ्रमण (फिल्ड)मा निस्किएका छन् । उनी आज भक्तपुर पुगेका छन् । 

भक्तपुर दरबार क्षेत्रको अवलोकन गर्नुका साथै तलेजु भवानीको दर्शनसमेत गरेका छन् । उनी भक्तपुरवासीको निमन्त्रणामा त्यहाँ पुगेको दाबी गरिएको छ । सामन्तवादका नाइकेको आरोप खेपिरहेको राजसंस्था (राजा) जनयुद्ध र २०६२/६३ को जनआन्दोलनले दरबारबाट गहलत्याएपछि पछिल्लो चरणमा दुई पार्टीले खुला रुपमा राजसंस्था पुनः स्थापनाको वकालत गरिरहेका छन् ।

तर प्रमुख राजनीतिक दल र सरकारले भने ‘मसानघाट’मा पुगिसकेको राजसंस्था फिर्ता हुने कल्पना नगर्न चेतावनी दिँदै आएका छन् । धर्मकाे नाममा राजनीतिक भावकाे गतिविधि नगर्न र सक्रियता नदेखाउन, देखाएमा सेवा सुविधा खाेस्ने चेतावनी समेत दिँदै आएका छन् ।

मुलुकमा भ्रष्टाचार र बेथिति बढदै गएपनि सर्वसाधारणले पनि ‘राजा’को याद गर्न थालेको रातन्त्र पक्षधरहरुको तर्क छ । राप्रपाका अध्यक्ष एवं सांसद राजेन्द्र लिङदेनले त गत साता काठमाडौंमा आयोजित सार्वजनिक कार्यक्रममबाटै ज्ञानेन्द्रलाई कुनै रुपबाट स्थान दिएर शासनमा ल्याउनुपर्ने प्रस्ताव नै राखेका थिए । 

पूर्वराजा ज्ञानेन्द्र दरबारबाट विस्थापितपछि कुनै न कुनै रुपमा जनतासँग भेटघाटन गर्ने र राष्ट्रिय पर्वहरुमा विज्ञप्ति जारी गर्दै राजनीतिक चाह व्यक्त गर्दै आइरहेका छन् । उनकाे व्यवहारले राजनीतिमा आउने चाहना प्रकट भइरहेकाे छ । उनले विशेष गरी धार्मिक भ्रमण र अनुष्ठानमार्फत ‘फिल्ड’मा जाने काम गर्दै आइरहेका छन् ।