प्रधानमन्त्री प्रचण्डविरुद्ध मंसिर १८ मा कस्तो आउँछ आदेश ?

७ असोज, काठमाडौं । प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डविरुद्ध परेको अदालतको अवहेलना मुद्दाको आदेश मंसिर १८ गते आउँदैछ । सर्वोच्च अदालतले आइतबार रिट निवेदक र विपक्षी दाहालका कानुन व्यवसायीको बहस सुनिसकेर निर्णय सुनाउने मिति मंसिर १८ गते तय गरेको छ । 

सर्वोच्च अदालतका न्यायाधीशद्वय ईश्वरप्रसाद खतिवडा र कुमार रेग्मीको इजलासले बहस सुनिसकेर आदेश सुनाउने मिति तोकेको हो । प्रचण्डले अदालतको अवहेलना गरेको भन्दै वरिष्ठ अधिवक्ता दिनेश त्रिपाठीले रिट दायर गरेका थिए । प्रचण्डको अभिव्यक्तिले अदालतको अवहेलना भएको भन्दै त्रिपाठीले २०७३ जेठ १२ मा सर्वोच्च अदालतमा रिट दायर गरेका थिए ।

माओवादी केन्द्रका अध्यक्ष प्रचण्ड २०७३ वैशाख अन्तिममा आफूविरुद्ध षड्यन्त्र भएको अभिव्यक्ति दिएका थिए । उनले माओवादीविरुद्ध द्वन्द्वकालीन मुद्दालाई लिएर अदालत प्रयोग भएको भन्दै आलोचना गरेका थिए । सोही अभिव्यक्तिलाई लिएर अदालतमा मुद्दा परेको थियो । अब १८ मंसिरमा अदालतले कस्तो आदेश दिन्छ भन्ने चासो राजनीतिक बृतमा बढेको छ ।