दुई देशको सम्बन्धमा नयाँ आयाम थपिएको छ : चिनियाँ प्रधानमन्त्री

८ असोज, काठमाडौं । चिनियाँ प्रधानमन्त्री लि छ्याङले चीन–नेपालबीचको सम्बन्धमा नयाँ आयाम थपिएको बताएका छन् । चीन भ्रमणमा रहेका प्रधानमन्त्री प्रचण्डसँगको भेटवार्ता अघि स्वागत मन्तव्यमा छयाङले यस्तो बताएका हुन् । 

प्रधानमन्त्री छ्याङले नेपालका प्रधानमन्त्री प्रचण्डको यस भ्रमण द्विपक्षीय सम्बन्धको विस्तार र सुदृढीकरण गर्न थप सहयोग पुग्न विश्वास चीनले लिएको बताए । नेपालको सदियौं पुरानो एक छिमेकी रहेको र चीनले सदैव नेपालको विकास, समृद्धि र हित चाहेको बताए ।

सो क्रममा प्रधानमन्त्री प्रचण्डले आफ्नो भ्रमणले चीन–नेपाल सम्बन्धलाई थप सुमधुर बनाउन योगदान पुर्‍याउने विश्वास व्यक्त गरे ।

त्यसपछि दुई देशका प्रधानमन्त्रीबीच आज बिहान चीनको राजधानी बेइजिङमा भेटवार्ता सुरू भएको हो । हाल बेइजिङस्थित ग्रेट हल अफ दि पिपुल्स कंग्रेसमा द्विपक्षीय भेटवार्ता चलिरहेको छ ।

स्वागतका क्रममा प्रधानमन्त्री प्रचण्डलाइ ‘गार्ड अफ अनर’ प्रदान गरिएको छ । चीनको राष्ट्रिय जनमुक्ति सेनाको विशेष टुकडीले ‘गार्ड अफ अनर’ प्रदान गरेको हो । प्रचण्ड भ्रमण सकेर असोज १३ गते स्वदेश फर्किनेछन् ।