धान-चामल र चिनीकाे आपूर्ति सहज बनाउने विषयलाई भारतले नसुनेझैं गर्यो : मन्त्री रिजाल

८ असोज, काठमाडौं । उद्योग, वाणिज्य तथा आपूर्ति मन्त्री रमेश रिजालले भारतीय पक्षले आपूर्ति सहज बनाउने विषयलाई नसुनेझैं गरेको बताएका छन् । मन्त्री रिजालले आज केन्द्रीय समितिको बैठकमा नेताहरुले सरकारमा रहेका मन्त्रीहरुको कार्यशैलीबारे उठाएको प्रश्नको जवाफ दिँदै यस्तो बताएका हुन् । 

केन्द्रीय समिति बैठकमा बोल्ने अधिकांश सदस्यहरुले सरकारले महँगी र खाद्यान्नको सहज आपूर्ति हुन नसकेको भन्दै पार्टीबाट सरकारमा रहेका मन्त्रीहरुमाथि प्रश्न उठाएका थिए । नेपाली बजारको मुख्य आपुर्तिकर्ता भारतले धान, चामल र चिनीको आपूर्तिमा कडाइ गरेको छ । जसका कारण बजारमा महंगी ह्वात्तै बढेको छ । 

जवाफ दिने क्रममा मन्त्री रिजालले भने,  ‘धान, चामल र चिनीको विषयमा इण्डियाको वाणिज्य मन्त्रीसँग पनि कुरा गरें । हुन्छ, म छिट्टै गर्छु भन्छन्, तर अहिलेसम्म कार्यान्वयनमा आउन सकेको छैन ।’ उनले यो विषयमा नेपालका लागि भारतीय राजदूतसँग धेरैपटक कुराकानी भएको खुलाए ।  ‘राजदूतले पनि कुरा भइराखेको छ, चिन्ता नगर्नुस् भन्छन्, तर परिणाम आएको छैन’ उनले भने । 

धान र चामल आपूर्ति गर्न सरकारले भारतलाई पत्राचार पठाएको जानकारी समेत दिए । पत्रको जवाफ समेत नआएको उनले बताए । चिनीको अभाव टार्न साल्ट ट्रेडिङ र नेशनल ट्रेडिङलाई टेण्डर खुलाउन आग्रह गरिएको जानकारी बैठकमा उनले दिएका छन् ।