एमालेले सरकार परिवर्तनमा ध्यान दिएको छैन : महासचिव पोखरेल

८ असोज, काठमाडौं । नेकपा (एमाले)ले अहिले पार्टीले सरकार परिवर्तन गर्ने विषयमा ध्यान नदिएको बताएको छ । सोमबार पार्टीको बागमतीको प्रथम अधिवेशनको उद्घाटन सत्रलाई सम्बोधन गर्नै महासचिव शंकर पोखरेलले एमाले अहिले सरकार परिवर्तन गर्ने खेलमा नरहेको बताए । 

उनले अहिले  एमाले ‘मिसन ८४’मा रहेको र एमालेलाई मुलुकको ठूलो राजनीतिक शक्ति बनाउने कार्ययोजनासहित अगाडि बढिरहेको बताए । अहिले मुलुकमा पहिचान र धर्मको नाममा भडकाव ल्याउन खोज्ने तत्वहरु सक्रिय रहेको उनको भनाइ छ । 

‘अहिले एमालेले सरकार परिवर्तन गर्ने विषयमा ध्यान दिएको छैन’ महासचिव पोखरेलले भने, ‘हामी आउँदो ८४ को चुनावमा पहिलो पार्टी बन्ने विषयमा केन्द्रित भइरहेका छौं ।’ उनले मिसनलाई सफल बनाउन सबै नेता कार्यकर्ता लाग्न समेत निर्देशन दिए । 

अहिले एमालेले सरकारको नेतृत्व गरेको जनताले चाहेको तर एमाले सरकारको गलत कामप्रति खबरदारी गर्दै पार्टीलाई सशक्त र बलियो बनाउने कामलाई मुख्य रुपमा लिएको उनले बताए ।