कम्पनीको हित विपरीत काम गरेपछि नेपाल लाइफ इन्स्योरेन्सका सीईओ पराजुलीलाई हटाउने तयारी

८ असोज, काठमाडौं । नेपाली बीमा बजारको अग्रणी संस्था नेपाल लाइफ इन्स्योरेन्स कम्पनीले प्रमुख कार्यकारी अधिकृत (सीईओ) प्रवीण रमण पराजुलीलाई हटाउने तयारी गरेको छ । सञ्चालक समितिले दिएको निर्देशन विपरीत कम्पनीको अहितमा काम गरेको भन्दै पराजुलीलाई हटाउन लागिएको हो । उनी जिम्मेवारीमा आएको केही समयदेखि नै इन्स्योरेन्सको इथिक विपरीत काम गरेको बताइएको छ । 

कर्मचारी स्रोतका अनुसार पराजुलीले अन्य समानान्तर कम्पनीसँग मिलेर व्यवसाय नै कमजोर बनाएको गुनासो सञ्चालक समितिमा आएपछि उनलाई हटाएर नयाँ सीईओ नियुक्त गर्न लागिएको छ । पराजुलीले नेपाल लाइफ इन्स्योरेन्स कम्पनीमा रहँदा बीमा प्राधिकरणबाट जारी संस्थागत सुशासनसम्बन्धी निर्देशिकाहरुकाे समेत पालन नगरेको बताइएको छ । बीमा प्राधिकरणबाट पनि पराजुलीका विषयमा विभिन्न टीकाटिप्पणी हुन थालेपछि यस अघि नै सञ्चालक समितिले हटाउन खोजेको थियो । 

आर्थिक वर्षको अन्त्यको समय भएकाले उनलाई हटाउन ढिला गरिएको कर्मचारी स्रोतको भनाइ छ । पराजुलीलाई सीईओमा नियुक्ति गर्ने समयमै पनि सञ्चालक समितिमा विवाद आएको थियो । उनी यसअघि रिलायन्स इन्स्योरेन्समा थिए । उक्त कम्पनी अहिले सानिमासँग गाभिएर सानिमा रिलायन्स लाइफ इन्स्याेरेन्स भएकाे छ । त्यहाँ रहँदा पनि उनको कार्यसम्पादन क्षमतामाथि प्रश्न उठाइएको थियो । यसपछि सञ्चालक समितिका सदस्य कृष्णराज लामिछानेलाई प्रभावमा पारेर उनी नेपाल लाइफमा आउन सफल भएका थिए । यस कम्पनीको संचालक समितिको अध्यक्षमा गोविन्दलाल संघाई रहेका छन ।   

पराजुलीलाई कार्यकारी प्रमुखमा ल्याएपछि नेपाल लाइफको व्यवसायमा निरन्तर गिरावट आएको छ । केही समय यताको विवरण हेर्ने हो भने नेपाल लाइफ इन्स्योरेन्सको व्यवसाय बृद्धि निरन्तर सुस्ताउँदै गएको छ । आर्थिक वर्षको वार्षिक विवरण तयार हुनु अगाडि नै पराजुलीलाई हटाउँदा कम्पनीको बजारमा नराम्रो सन्देश जाने भएकाले रोकिएको थियो । गर्तवर्ष नेपाल लाइफको व्यवसाय बृद्धि नगण्य छ । गत आर्थिक वर्ष २०७९/८० को चौथो त्रैमासलाई आधार मान्दा कम्पनीको खुद बीमा शुल्क आर्जन सामान्य ४ दशमलव  ६९ प्रतिशतमा सीमित रहेको स्रोत बताउँछ ।   

वित्तीय विवरणले पनि कार्यकारी प्रमुख पराजुलीको कार्य क्षमतालाई कमजोर देखाउँछ । उनको कार्यकालमा व्यवसाय बृद्धिदर राम्रो नहुँदा अभिकर्ता कमिशन पनि घटेको छ । अघिल्लो वर्ष ३ अर्ब ५२ करोड रूपैयाँ अभिकर्ता कमिशनमा खर्च गरेको कम्पनीले गत आर्थिक वर्षमा ३ अर्ब १० करोडमात्र खर्च गरेको छ । त्यस्तै भुक्तानी हुन बाँकी दाबी अर्बौंमा छ । कम्पनीले १ अर्ब ३८ करोडभन्दा धेरै दाबी भुक्तानी गर्न बाँकी रहेको देखिन्छ । उनले कम्पनीको दाबी भुक्तानीलाई निकै कमजोर बनाएका छन् । 

त्यस्तै कम्पनीले दिने लाभांश निरन्तर घट्दै छ । ५ वर्षको औसत लाभांश ४० प्रतिशत रहेकोमा विगत २ आर्थिक वर्षदेखि कम्पनीले औसत भन्दा कम लाभांश दिएको छ । आर्थिक वर्ष ०७७/७८ मा १५ दशमलव ७९ प्रतिशत लाभांश दिएको कम्पनीले आर्थिक वर्ष ०७६/७७ मा १४ दशमलव  ७३ प्रतिशत लाभांश दिएको थियो । पराजुली नेपाल इन्स्योरेन्सको कार्यकारी प्रमुख भएर आएपछि दाबी भुक्तानीको अवस्था निकै खस्किएको कर्मचारीहरू बताउँछ । 

बीमा रकम माग दाबी गर्न आएका ग्राहकले समयमा भुक्तानी पाउन नसक्दा निकै ठूलो समस्या खडा भएको छ । विस्तारै कम्पनीमा बीमा गर्ने ग्राहकहरुको पनि संख्या घट्दै गएको छ । यसअघि बीमा गरेकाहरूले बीमा शुल्क तिर्न छोड्दै गएका छन् । बजारमा अन्य धेरै बीमा कम्पनी भएकाले उनीहरू नेपाल लाइफ छोडेर अन्यत्र जान थालेका छन् । बीमा सरेण्डर गर्नेकाे संख्या बढेर गएकाे छ । ग्राहकलाई कम्पनीमै निरन्तर राख्ने खालका योजना र कार्यक्रम पराजुलीले दिन नसकेका कारण बीमा गर्नेहरूको संख्या घट्दै गएको कर्मचारी बताउँछन् । 

यस्ता विभिन्न कारण देखाएर पराजुलीलाई नेपाल लाइफबाट बिदा गर्न लागिएको छ । बजारमा पनि पराजुलीको कार्यक्षमताबारे राम्रो चर्चा छैन । अहिले सञ्चालक समितिले नयाँ सीईओ तयारी अवस्थामा राखेको छ । आउने नयाँ कार्यकारी प्रमुखसँग सबै कुरा भइसकेपनि पराजुलीलाई  कम्पनीबाट हटाएर मात्र उसलाई नियुक्त गर्ने तयारी छ । कार्यकारी प्रमुख पराजुलीको कम्पनीकै अन्य कर्मचारीसँग पनि राम्रो व्यवहार नभएको बताइन्छ । उनीसँग अधिकांश कर्मचारी असन्तुष्ट छन् ।    

०७९ असार ३१ गते बसेको सञ्चालक समितिको बैठकले वरिष्ठ नायव प्रमुख कार्यकारी अधिकृत रहेका पराजुलीलाई प्रमुख कार्यकारी अधिकृतमा बढुवा गरेको थियो । उनी ०७८ पुस २५ गते नेपाल लाइफको सिनियर डीसीओमा नियुक्त भएका थिए । पराजुली यसअघि रिलायन्स लाइफ इन्स्योरेन्समा सीईओ थिए। उनी एक तह घटुवा भएर नेपाल लाइफ भित्रिएका थिए । कम्पनीले सुरुवाती अवस्थामा पराजुलीलाई डिसीओमै राख्ने र प्रमुख कार्यकारी अधिकृत बाहिरबाट ल्याउने योजनामा थियो । तर आफूले भने जस्तो व्यक्ति नपाएपछि कम्पनीले पराजुलीलाई नै नियुक्ति गर्न बाध्य भएको थियो।