नगरविकास कोष र वालिङ नगरपालिकाबीच सम्झौता

♦ मणी प्रसाद अर्याल

८ असोज वालिङ । व्यवस्थित सवारी पार्किङको समस्या भोगिरहेको वालिङको समस्या समाधान हुने भएको छ । वालिङ बजारको शितलनगरमा आधुनिक बसपार्कको निर्माणको लागि नगरपालिकाले नगरविकास कोषसँग सम्झौता गरेसँगै समस्या समाधान हुने भएको हो ।

सोमबार नगरविकास कोषसँग कुल १२ करोड २७ लाख ५७ हजार रूपैयाँको सम्झौता भएको नगर प्रमुख कृष्ण खाँणले जानकारी दिए । नगर प्रमुख खाँणका अनुसार कुल सम्झौता रकममध्य नगरविकास कोषसँग ६ करोड ७५ लाख १६ हजार ३ सय ५० ऋण लिइएको हो भने नगरपालिकालाई १ करोड २२ लाख ७५ हजार ७ सय रुपैयाँ नगरविकास कोषबाट नै अनुदान प्राप्त भएको हो । त्यसैगरी,  ४ करोड २९ लाख ६४ हजार ९ सय ५० रुपैयाँ वालिङ नगरपालिकाले लगानी गर्नेछ ।

देशकै स्मार्ट सिटीको नामले परिचित वालिङमा सवारी साधन व्यवस्थित रुपमा पार्किङ गर्ने ठाउँको अभावले बजार क्षेत्र कुरूप तथा साघुरो बनेको थियो । सवारी पार्किङको समस्या समाधानको लागि विस्तृत परियोजना प्रतिवेदन (डीपीआर) तयार भैसकेको अवस्थामा योसँगै बसपार्क निर्माणको कामले सार्थकता पाउने भएको छ । 

सम्झौता कार्यक्रमपछि नगरप्रमुख कृष्ण खाँणले स्मार्ट सिटीको नामले परिचित वालिङमा बसपार्कको समस्या छ भन्न पनि अफ्ठ्यारो हुने अवस्था अन्त्य भएको उल्लेख गरे । उनले व्यवस्थित बसपार्क निर्माण भएपछि नागरिकले निर्वाध हिडडुल गर्न पनि नपाएको अवस्था टर्ने विश्वास व्यक्त गरे ।

नमुना बसपार्क निर्माणको लागि शहरी विकास कोषको ९० प्रतिशत तथा  वालिङ नगरपालिकाको १० प्रतिशत  लगानीमा डीपीआर तयार भएको थियो । नमुना बसपार्कको टर्मिनल भवन, घेरा पर्खाल, वर्कशप, आन्तरिक बाटो लगायत सम्पूर्ण निर्माणको लागि १४ करोड ४१ लाख रूपैयाँ बजेट अनुमान गरिएको छ । यसको लागि शहरी विकास कोषबाट ८० प्रतिशत ऋण तथा वालिङ नगरपालिकाको २० प्रतिशत लगानीमा काम सम्पन्न हुनेछ ।

निर्माण सम्पन्न भए पश्चात् बसपार्कमा प्रति घण्टा ९६ वटा सवारी साधनहरु पार्किङ गर्न सकिनेछ ।जीप,मिनीबस,माइक्रोबस लगायतका छोटो दुरीमा चल्ने सवारी साधनहरु प्रति घण्टा ४२ वटा पार्किङ गर्न सकिनेछ । त्यसैगरी, लामो दुरीमा चल्ने बसहरू प्रति घण्टा ४८ वटा र बिजुलीबाट चल्ने बसहरू प्रति घण्टा ८ वटा, प्रति घण्टा २ पाङ्ग्रे १० वटा,निजी सवारी कारहरू २० वटा अटाउनेछन् । बसपार्क निर्माणको लागि यसै आर्थिक वर्षमा टेण्डर आह्वान हुने नगरपालिकाका इन्जिनियर ध्रुव रेग्मीले जानकारी दिए ।