आगामी चुनावबाट एमाले एक्लैले बहुमतको सरकार बनाउँछ : ओली

८ असोज, काठमाडौं । प्रमुख प्रतिपक्षी नेकपा (एमाले)का अध्यक्ष केपी शर्मा ओलीले आगामी २०८४ को आम चुनावबाट प्रतिनिधिसभामा धेरै सदस्य संख्या जितेर पर्याप्त बहुमतको सरकार बनाउने दाबी गरेका छन् । 

सोमबार पार्टीको बागमती प्रदेशको प्रथम अधिवेशनको उद्घाटन सत्रलाई सम्बोधन गर्दै पार्टीले मिसन ८४ चलाइरहेको र ८४ सालको चुनावपछि एमाले एक्लैले बहुमतको सरकार बनाउने दाबी गरे । उनले मुलुकको स्वाभिमानको झण्डा एमालेले मात्र बोक्ने काम गरिरहेको बताउँदै अहिलेका सरकारमा रहेका दलहरु विदेशीसँग आफ्नो भूमि मिचिएको बारे शिर ठाटो पारेर कुरा गर्न नसकेको आरोप लगाए । 

देश र जनताको पक्षमा काम गर्ने पार्टी एमाले मात्र रहेको भन्दै एमालेलाई टुक्र्याउने हरेक षडयन्त्रलाई चक्नाचु र धुलोपीठो पारिदिने बताए । उनले सोहीअनुरुप अगाडि बढन समेत सहभागीहरुलाई निर्देशन दिए । एमाले हाल संसदमा २७५ मा ७८ सिटसहित दोस्रो दल बनेको छ । बहुमतको सरकार बनाउन १३८ सांसद आवश्यक पर्छ ।

आगामी ८४ को चुनावबाट आफ्नो दलले बहुमतको सरकार बनाउने दाबी रास्वपाले पनि गर्दै आइरहेको छ । संसदमा उसको २१ सिट छन् । पार्टीको नेतृत्व रबि लामिछानेले गरिरहेका छन् ।