सुरक्षाको माग गर्दै डाक्टर र नर्सहरू एप्राेनसहित उत्रिए सडकमा

९ असोज, काठमाडौं । सुरक्षाको माग गर्दै चिकित्सकहरुले सडकमा उपचार पाेशाक (एप्राेन)सहित प्रदर्शन गरेका छन् । मंगलबार बिहान ११ बजेदिख माइतीघर मण्डलामा भेला भएर चिकित्सक, नर्सहरुले आफूहरु कार्य क्षेत्रमा असुरक्षित क्रम बढ्दै गएको भन्दै चिकित्सक र नर्सहरुमाथिको आक्रमण रोक्न माग गरेका छन् । 

सोमबार पोखराको मणिपाल अस्पतालमा लमजुङका एक बिरामीको मृत्यु भएपछि मृतका आफन्तले चिकित्सक र नर्सहरुमाथि आक्रमण गरेका थिए । उनीहरु आक्रमणकारीलाई तत्काल पक्राउ गरी कडा कारवाही गर्न माग गरेका छन् । कार्यस्थलमा सुरक्षाको प्रबन्ध गर्न माग राखेका छन् ।

स्वास्थ्यकर्मी तथा स्वास्थ्य संस्थाको सुरक्षा सम्बन्धी पहिलो संशोधन ऐन २०७९ अबिलम्ब कार्यान्वयन गर्न समेत माग गरेका छन् । दर्जनौं संख्यामा डाक्टर र नर्सहरु माइतीघर मण्डलामा ब्यानर र प्लेकार्डसहित प्रदर्शन गरिरहेका छन् । उनीहरुले उपप्रधान तथा गृहमन्त्री नारायणकाजी श्रेष्ठ र स्वास्थ्य तथा जनसंख्या मन्त्री मोहनबहादुर बस्नेतको राजीनामाको माग गरे ।

यसअघि भदौ २६ मा मकवानपुरको हेटौंडास्थित सन्चो अस्पतालमा एक बिरामीको मृत्युको विषयलाई लिएर मृतकका आफन्तले दुई चिकित्सकमाथि उपचार कक्षमा पुगेर कुटपिट गरी घाइते बनाइदिएका थिए । सो घटनामा मृतकका श्रीमती, छोरी, छोरी, भतिजा सहित ७ जनालाई प्रहरी पक्राउ गरी अुनसन्धान जारी राखेको छ ।

यस्तै, सामुदायिक विद्यालयका राहत, पेन्सनबाट वञ्चित तथा ईसीडी शिक्षक र कर्मचारीहरूले पनि आज आन्दाेलन जारी राखेका छन् । उनीहरूले माइतीघर मण्डलामा धर्ना सुरू गरेका छन्र ।