आईपीएस सम्मेलनमा प्रधानसेनापति शर्माको सहभागिता बारे नेकपाले उठायो प्रश्न

९० असोज, काठमाडौं । नेत्रविक्रम चन्द ‘विप्लव’ नेतृत्वको नेपाल कम्युनिस्ट पार्टीले अमेरिकी नेतृत्वको सैन्य संगठन हिन्द प्रशान्त रणनीति (आईपीएस)मा प्रधानसेनापति प्रभुराम शर्माको सहभागिता बारे प्रश्न उठाएको छ । 

नेकपाका महासचिव विप्लवले आज एक प्रेस विज्ञप्ति जारी गर्दै विवादस्पद र आलोचित संगठनको सम्मेलनमा सहभागी हुनुले गम्भीर प्रश्न उब्जाएको जनाएका छन् । आईपीएसको अंग एमसीसीको नेपालभित्र संचालित परियोजनामाथि प्रश्न उठिरहेका बेला आईपीएस सम्मेलनमा शर्माको सहभागिताले स्वाभिमानी नेपालीलाई चिन्तित तुल्याएको विप्लवको तर्क छ । उनले आईपीएसलाई हिन्द प्रशान्त क्षेत्रमा अमेरिकी सैन्य नियन्त्रणलाई सुदृढ गरेर एसियामा आफ्नो प्रभुतत्व बलियो बनाउने अमेरिकी आक्रामक विध्वंसकारी सैन्य गठबन्धन भएको बताएका छन् । 

राजनीतिक दलहरूले आईपीएसमा नेपाल सहभागी हुन नहुने भन्ने बताइरहेका बेला शर्माको सहभागिताले नेपाल उक्त सैन्य गठबन्धनमा आबद्ध भएको सन्देश गएको समेत दाबी गरेका छन् । भारतको नयाँ दिल्लीमा सोमबाट सुरु भएको आईपीएस सम्मेलनमा सहभागी हुन शर्मा यही शनिबार त्यसतर्फ प्रस्थान गरिसकेका छन् । प्रस्थानको ४ दिनपछि विप्लवले विरोधमा विज्ञप्‍ति निकालेका छन् । 

शर्माको सहभागिताले विश्वमै तरंग पैदा गरेको र यसले नेपाली जनताको चाहना र नेपालको भू–राजनैतिक संवेदनशीलतालाई बोध गर्न नसकेको स्पष्ट बनाएको जनाएका छन् । ‘गैरजिम्मेवार’ सहभागिताप्रति पार्टीको गम्भीर ध्यानाकर्षण भएको जनाउँदै यसबारे सरकारले आधिकारिक धारणा सार्वजनिक गर्न माग गरिएको छ । साथै ‘गैरजिम्मेवार हर्कत’ले नेपाल र नेपाली जनतालाई अनावश्यक र अकल्पनीय क्षति पुग्ने सक्ने तर्फ नेकपाले सबैलाई सचेत बन्न समेत अपिल गरेको छ