चाडपर्व लक्षित सुरक्षा योजना बनाएर लागू गर्न प्रहरी मुख्यालयको सर्कुलर

९ असोज, काठमाडौं । प्रहरी प्रधान कार्यालयले नजिकिँदै गरेका चाड पर्वहरूलाई लक्षित गरी विशेष सुरक्षा योजना बनाएर लागू गर्न देशभरका प्रहरी युनिटमा सर्कुलर जारी गरेको छ ।

चाडपर्वलाई लक्षित गरी आवश्यक सुरक्षा प्रबन्धसहित सुरक्षा योजना तयार पारेर लागू गर्न सर्कुलर जारी गरेको प्रधान कार्यालय स्रोतले बतायो । चाडपर्वमा घटना, दुर्घटना तथा आपराधिक गतिविधि रोक्ने गरी सुरक्षा व्यवस्थालाई चुस्त–दुरुस्त पार्ने गरी छुट्टै सुरक्षा योजना बनाएर लागू गर्न सर्कुलर गरिएकाे बताइएको छ ।

विशेष सुरक्षा योजनामा सम्भावित जोखिम क्षेत्रको पहिचान गरी चोरी तस्करीलगायत आपराधिक क्रियाकलापहरू रोक्न साविकभन्दा बढी सुरक्षाकर्मी परिचालन गरिने भएको छ । 

प्रहरीको हरेक युनिटले सुरक्षा चुनौतीअनुसार आ–आफ्नै सुरक्षा योजना तयार पारेर लागू गर्न सकिने जनाइएको छ । चाड पर्वमा २४ सै घण्टा सुरक्षाकर्मी खटिनेछ । चाड पर्वमा आपराधिक समूहले धनमाल चोरी, डकैती, लुटपाट, अपहरण लगायत जघन्य अपराध समेत गराउन सक्ने भन्दै प्रहरीले विशेष सतर्कता अपनाउँदै आइरहेको छ ।