रोजगारीका लागि टर्की पठाइदिने भन्दै करोड ठगी गर्ने गिराेहका सदस्य पक्राउ

९ असोज, काठमाडौं । टर्कीमा रोजगारीमा पठाइदिने भन्दै विभिन्न व्यक्तिबाट एक करोड बढी ठगी गरेको आरोपमा गिरोहका सदस्यमध्ये एक जना पक्राउ परेकी छन् । सीआईबीका अनुसार पक्राउ पर्नेमा कास्कीको पोखरा महानगरपालिका–५ लेखनाथ टोलका ३२ वर्षीय सुरुची भुजेल रहेकी छन् । उनलाई शनिबार पोखराबाट पक्राउ गरी काठमाडौं ल्याइएको हो ।

सुरुचीले पोखराकै विनोद श्रेष्ठ समेतले सिर्जन कुमार राई समेत ३० जनालाई टर्कीमा आकर्षक रोजगारीको प्रलोभन देखाएर सवा करोड रुपैयाँ उठाएको पाइएको छ । रोजगारीमा मासिक एक कजार ४ सय अमेरिकी डलर आम्दानी हुने प्रलोभन दिएर रकम असुलेकाे खुलेको छ । उनले ३१ जनाबाट हालसम्म १ करोड १५ लाख ९९ हजार आठ सय रकम ठगी गरेको पाइएको प्रहरीको दाबी छ ।

ठगीको उजुरी वैदेशिक रोजगार विभाग ताहाचल, काठमाडौंमा परेको थियो । सो आधारमा विभागले अनुसन्धान गर्न सीआईलाई जिम्मा दिएको थियाे । सुरूची ठगीका मुख्य याेजनाकार रहेकाे बताइन्छ ।

आरोपी सुरुचीलाई साथ दिने अन्य सदस्य पनि रहेको प्रहरीको दाबी छ । जिल्ला अदालत काठमाडौंबाट म्याद लिई आवश्यक अनुसन्धान भइरहेको प्रहरीले जनाएको छ ।