आठ दिनदेखि उभिरहेका ईः र काठमाडौं महानगरपालिकाबीच वार्ता सुरू

९ असोज, काठमाडौं । काठमाडौंमा फुटपाथ व्यापारीलाई वैकल्पिक व्यवस्थाबिना हटाउन नहुने माग राख्दै ८ दिनदेखि महानगरका मेयर बालेन साहको कार्यालय अगाडि सडक पेटीमा उभिएर सत्याग्रह चलाइरहेका अभियन्ता ईःसँग काठमाडौं महानगरपालिकाले वार्ता थालेको छ ।

आज बिहान मात्र उपमेयर सुनिता डंगोलले ईःलाई सत्याग्रहस्थलमा पुगेर भेटेकी थिइन् । भेटमा उनले समस्या समाधानबारे सक्दो पहल लिने बताएकी थिइन् । अभियन्ता ईः ले यही असोज २ गतेदेखि प्रदर्शनीमार्ग स्थित कार्यालय अगाडि सडकपेटीमा निरन्तर उभिएर महानगरको ध्यानाकर्षण गराइरहेका छन् ।

काठमाडौं महानगरपालिकाका प्रवक्ता नवीन मानन्धरको नेतृत्वको वार्ता टोली अभियन्ता ईःसहितको टोलीबीच वार्ता चलिरहेको छ । महानगरपालिकाका मेयर साहले विना विकल्प महानगरभित्रका फुटपाथबाट व्यापारीलाई हटाएको विरोधमा फुटपाथ व्यापारीहरुको आन्दोनलमा अभियन्ताहरुले साथ दिइरहेका छन् ।

निरन्तर उभिइएका कारण ईःकाे खुट्टा सुन्निएका छन् । स्वास्थ्यमा समेत समस्या देखिन थालेकाे छ । चाैबिसै घण्टा उभिइरहने उनी खानेकुरा समेत उभिएरै खान्छन् ।

आफ्नाे वास्तविक परिचय सार्वजनिक गर्न नरूचाउने ईःले यसअघि चलाएकाे ‘इनफ इज इनफ’ अभियान चर्चित रहेकाे छ ।