उपप्राध्यापक प्रेम चलाउनेको मुद्दामा थप प्रमाण बुझ्ने आदेश

९ असोज, काठमाडौं । त्रिभुवन विश्वविद्यालयका उपप्राध्यापक प्रेम चलाउनेको ज्यान मार्ने उद्योगसम्बन्धी मुद्दामा थप प्रमाण बुझ्ने आदेश भएको छ । फैसला चरणमा पुगिसकेको भनिएको मुद्दामा काठमाडाैं जिल्ला अदालतका न्यायाधीश उत्तम सिलुवालको इजलासमा २ दिन सुनुवाइपछि मंगलबार घाउ जाँच गर्ने डाक्टरसँग बुझ्ने आदेश भएको हो । 

चलाउनेविरुद्ध ०७७ असोज २० गते नेविसंघको त्रिवि ईकाइका अध्यक्षसहित विद्यार्थीहरुले त्रिविभित्रै रड प्रहारसहित सांघातिक आक्रमण गरेका थिए । उनी अहिले पनि हिँडुडुलमा वैशाखीको सहायता आवश्वयक छ । 
चलाउनको किटानी जाहेरीका आधारमा प्रहरीले योगेन्द्र रावल, दीपकराज ओझा, हरिप्रसाद आचार्य, रुपेश साह, रविनकुमार लामा, सयुज श्रेष्ठ र निरज रानामगर लगायतविरुद्ध ज्यान मार्ने उद्योगको अभियोगमा मुद्दा चलाएको छ । 

कांग्रेससमेत सहभागी वर्तमान सरकारले मुद्दा फिर्ता लिने निर्णय गरेकोमा सर्वोच्च अदालतको अन्तरिम आदेशले मुद्दा अन्तिम टुंगो लगाउनेतिर अगाडि बढेको छ । मुद्दा फिर्ता लिने निर्णयको विरोध चलाउनेले केही समयपहिले काठमाडौं जिल्ला अदालत परिसरमा धर्ना समेत दिएका थिए । त्यहाँबाट प्रहरीले उठाएपछि त्रिविभत्रै अनसन सुरु गरेका थिए ।

सो क्रममा उनले सर्वोच्चमा सरकारको निर्णयविरुद्ध रिट दायर गराए । उक्त रिटमाथि सुनुवाइ गर्दै सर्वोच्चले मुद्दा फिर्ता लिने निर्णय तत्काल कार्यान्वयन नगर्न अन्तरिम आदेश दिएको थियो ।