राजीनामा मागिएकै गृहमन्त्रीसँग चिकित्सकहरु वार्तामा

९ असोज, काठमाडौं । सुरक्षाको माग गर्दै सडकमा उत्रिएका चिकित्सकहरुसँग सरकारले वार्ता थालेको छ । उपप्रधान तथा गृहमन्त्री नारायणकाजी श्रेष्ठको नेतृत्वको टोलीले गृहमन्त्रालयमा केहीबेर अघिदेखि वार्ता सुरू गरेकाे हाे । सरकारी वार्ताँ टोलीमा स्वास्थ्यमन्त्रालयका अधिकारीसमेत सहभागी छन् । 

वार्तामा आन्दोलनकारी चिकित्सकहरुको तर्फबाट स्वास्थ्यकर्मी ट्रेड युनियन, मेडिकल काउन्सिल, चिकित्सक संघलगायतका प्रतिनिधि सहभागी छन् । स्वास्थ्यकर्मीमाथि श्रृंखलावद्ध आक्रमण हुन थालेपछि सुरक्षाको माग गर्दै डाक्टरहरू आज सडकमा उत्रिएका छन् । आज माइतीघर मण्डलामा भेला भएर स्वास्थ्यकर्मीहरूले स्वास्थ्यकर्मी तथा स्वास्थ्य संस्थाको सुरक्षासम्बन्धी पहिलो संशोधन ऐन २०७९ अविलम्व कार्यान्वयनको माग राखेका थिए ।

विराेध प्रदर्शनका क्रममा प्रहरीले चिकित्सकहरूमाथि बल समेत प्रयाेग गरेका थिए । त्यसबाट उनीहरू झनै क्रुद्ध बन्दै गृहमन्त्री श्रेष्ठ र स्वास्थ्यमन्त्री माेहन बस्नेतकाे राजीनामा माग गरेका छन् ।

सोमबार पोखराको मणिपाल अस्पतालमा लमजुङबाट ल्याइएका बिरामीको उपचारका क्रममा मृत्यु भएपछि मृतकका आफन्तले चिकित्सकको लापरवाहीले बिरामीको ज्यान गएको भन्दै चिकित्सक, नर्समाथि आक्रमण गरेका थिए । त्यसपछि उनीहरु सुरक्षाको माग गर्दै आन्दोलनमा उत्रिएका छन् ।