जिल्ला अदालतमा ६० किलो सुन तस्करी प्रकरणका २६ आरोपीको बयान सकियो, भोलिदेखि थुनछेक

९ असोज, काठमाडौं । जिल्ला अदालत काठमाडौंमा सुन तस्करी प्रकरणका ओरोपीहरुको बयान सकिएको छ । भोलिबाट अदालतमा थुनछेक बहस सुरु हुनेछ । हङकङबाट तस्करी गरेर काठमाडौँ ल्याएको ६० किलो ७ सय ग्राम सुन प्रकरणका संलग्न प्रतिवादीहरुको बयान आज सकिएको हो । 

सुन प्रकरणमा प्रहरीले नियन्त्रणमा लिएका २६ जनाको बयान काठमाडौँ जिल्ला अदालतका न्यायाधीश माधव प्रसाद मैनालीको इजलासमा भएको थियो । सुन प्रकरणको बुधबारबाट थुनछेक बहस सुरु हुनेछ । जिल्ला सरकारी वकिल कार्यालय काठमाडौंले ३ जना फरारसहित २९ जनालाई प्रतिवादी बनाएर  अदालतमा मुद्दा दायर गरेको थियो । 
 
चिनियाँ नागरिकहरू याओ पुचेङ, लि वेन सुङ, ली नेङकाई, डीङ सेग्फा, जीक्वाङ लिन, टीयान मि र वेन तोङलाई सुन तस्करीमा संलग्न आरोपमा प्रतिवादी कायम गरिएको छ । टीयान मि र वेन तोङ ठमेल स्थित केटीबी रेष्टुरेण्टका संचालक हुन् ।
 
तिब्बत मुलका भारतीय नागरिक थाप्तेन छिरिङसँग, बेल्जियन नागरिक दावा छिरिङ, हर्कराज राई, भन्सार एजेन्ट रुक्मिना सुब्बा, कृष्ण श्रेष्ठ र ट्रान्स ग्लोबल सर्भिसका संचालक पुष्करराज भट्टसहित २६ जना अहिले प्रहरीको हिरासतमा छन् ।