डाक्टरहरुको आन्दोलनको पहिलो दिनमै सरकारसँग सहमति

९ असोज, काठमाडौं । सरकार र आन्दोलनरत डाक्टरहरु (चिकित्सक)बीचको वार्ता सममति टुंगिएको छ । उपप्रधान एवं गृहमन्त्री नारायणकाजीको पहलमा सिंहदरबारमा आज दिउँसो भएको वार्तामा चिकित्सकहरुमाथि आक्रमणमा संलग्नहरुलाई कारवाही गर्ने, कार्यस्थलमा सुरक्षाको प्रबन्ध मिलाउने, हरेक स्वास्थ्य संस्थामा उपचारबारे कुनै गुनासो भए उजुरी गर्ने पेटिका राख्ने लगायत बुँदामा सहमति भएको हो । आन्दोलन थालेकै दिन सरकारले आन्दोलनरत डाक्टरहरुलाई वार्तामा बोलाएर सहमति गरेको हो ।

पोखराको मणिपाल शिक्षण अस्पतालमा सोमबार उपचारका क्रममा एक बिरामीको मृत्यु भएपछि सो विषयलाई लिएर मृतकका आफन्तले चिकित्सक र नर्सहरुमाथि आक्राण गरेर घाइते बनाएका थिए । सो घटनापछि चिकित्सक, नर्स आज बिहानदेखि माइतीघर मण्डलामा भेला भएर आक्रमणकारीलाई कारवाहीको माग गर्दै आन्दोलन थालेका थिए ।

वार्तामा सरकारको तर्फबाट मन्त्री श्रेष्ठ, स्वास्थ्यमन्त्री मोहन बस्नेत र आन्दोलनकारीको पक्षबाट नेपाल मेडिकल काउन्सिल, चिकित्सक संघ, नर्सिङ संघका प्रतिनिधिहरु सहभागी थिए ।

यसैबीच हप्ता दिनदेखि सडकमा आन्दोलन चलाइरहेका राहत शिक्षकहरुको मागबारे भने सरकार मौन बसेको छ । उनीहरुले सडकमा धर्ना बसेर सिठ्ठी फुकेर शिक्षा विधेयकको विरोध गरेका छन् । भोलि पनि आन्दोलन जारी रहने उनीहरुले बताएका छन् ।