प्रधानसेनापति भारतमा पुगेका बेला भारतीय सेना गुपचुप मै पोखरामा

१० असाेज, काठमाडौं । प्रधानसेनापति प्रभूराम शर्मा यति बेला भारत भ्रमणमा रहेका छन् । हिन्द–प्रशान्त क्षेत्रका १९ देशका सेना प्रमुख सहभागी रहेको सम्मेलनमा भाग लिन प्रधानसेनापति भारत पुगेका हुन् । उनी अझै दुई दिन भारतमा रहने कार्यक्रम छ । तर उनी भारत भ्रमणमा रहेका बेला भारतीय सेनाको एउटा टोली भने गुपचुप मै नेपाल आइपुगेको छ ।

नेपाली सेना उच्च स्रोतले दिएको जानकारी अनुसार नेपाल भ्रमणमा आएको भारतीय सैन्य टोली यति बेला पोखरा घुमघाममा छ । नौ जनाको उक्त टोली बुद्ध एअरको उडानमा मंगलबार त्यता गएको हो ।  मेजर जनरल आलोक ककेरसहितको टोली त्यता गएको हो, स्रोतले जनाएको छ ।  गोर्खा राइफलको ९ रेजिमेन्टका मेजर आलोक, लेफ्टिनेन्ट कर्नेल विश्वासकुमार मिश्र, रमेशप्रसाद सहित नौ जनाको टीम नेपाल आएको हो । तर उनीहरू घुमघामका लागि आएका हुन कि काम विशेषले नेपाल आएका हुन भन्ने बारेमा केही खुलेको छैन ।

भारतीय सेनाले नेपालको उत्तरी सीमानामा एकपछि अर्को पोस्ट स्थापना गर्दै गर्दा उनीहरूको नेपाल भ्रमण पनि बाक्लिएको स्रोतले जनाएको छ । यसरी उत्तरी सीमानामा पाँच वर्ष अघि हतियार र सञ्चार उपकरणसहित भारतीय सेनाका १७ पोस्ट खडा भएका छन् । यो बीचमा नेपाल सरकारले भारतीय सेनाको बसाइ र पोस्ट विस्तार रोक्न सकेन् । किनकी उनीहरूको पोष्ट भारतीय भूमिमै भएकाले पनि रोक्न कठिन थियो ।

खास गरी भारतीय सेनाले पटक पटक नेपाल भ्रमण गर्नुको कारण चाहि पाँचथरको च्याङथापु, ताप्लेजुङको ओलाङचुङगोला, संखुवासभाको चेपुवाघाँटी, सोलुखुम्बुको नाम्चे (च्याक्सा), दोलखाको लामाबगर, सिन्धुपाल्चोकको तातोपानी, रसुवाको रसुवागढी र सोम्दाङ, गोर्खाको अठारसय खोला र लार्के भञ्ज्याङ, मनाङको थोराङ पास, मुस्ताङको छुसाङ, डोल्पाको छार्काभोट, मुगुको गुगुगाउँ, हुम्लाको मुचु, बझाङको जावारीकोट, दार्चुलाको टिंकर भञ्ज्याङको अवलोकन गर्नु नै हो । उनीहरू बेलाबखत मिलाएर नेपाल भ्रमणको नाममा त्यहाँ पुगिरहन्छन् ।