‘पुष्पा’ र ‘अञ्जली’को नयाँ गन्तव्य कोशी टप्पु, केही समयपछि मात्र आरक्ष क्षेत्रमा छाडिने

१० असोज, काठमाडौं । चितवन राष्ट्रिय निकुञ्जबाट लगिएका दुईवटा पोथी गैंडा  ‘पुष्पा’ र ‘अञ्जली’लाई सप्तरी र सुनसरीस्थित कोशी टप्पु वन्यजन्तु आरक्षमा पुर्याइएको छ । उनीहरुलाई केही समय आरक्षको सप्तरीस्थित पथरी सेक्टरमा बनाइएको छुट्टाछुट्टै इक्लोजर (खुल्ला खोर)मा राखिने भएको छ । घुलमिल गराएपछि आरक्षको क्षेत्रमा छाड्ने भएको छ । 

‘पुष्पा’ र ‘अञ्जली’लाई पुर्याउन चितवनबाट निकुञ्जका प्रमुख संरक्षण अधिकृत दिलबहादुर पुर्जा पुन र भेटेरिनरी चिकित्सकसहितको टोली मंगलबार साँझ कोशी पुगेको थियो । टोलीले केही दिनसम्म निगरानी गर्नेछन् । प्राविधिक समितिले गरेको अध्ययनमा गैंडाका लागि बासस्थान उपयुक्त देखिएपछि चितवन राष्ट्रिय निकुञ्चमा हुर्किएका दुई गैंडा कोशी टप्पु लगिएको हो । ‘पुष्पा’ तीन वर्ष नौ महिना र ‘अञ्जली’ दुई वर्ष छ महिनाका छन् । केही समयपछि चितवनमा हुर्कँदै गरेका भाले गैँडालाई पनि टप्पु पठाउने योजना रहेको निकुञ्चले जनाएको छ ।

केही वर्षअघि टप्पुबाट निकुञ्जमा १३ वटा अर्ना ल्याइएको थियो । देशभर रहेका ७ सय ५२ मध्ये चितवनमा ६ सय ९४ गैंडा रहेको तथ्यांक छ । सन् १९८६ देखि गैँडा स्थानान्तरण कार्य सुरु गरेको थियो । सरकारले केही गैंडा विदेशीलाई उपहार दिँदै आएको छ ।

हाल मात्र चीन भ्रमणमा रहेका प्रधानमन्त्री प्रचण्डले चीनलाई एक जोडी एक सिंगे गैँडा उपहार दिने वचन दिएका छन् । एक सिंगे गैँडा विश्वमा दुर्लभ मानिन्छ । शिकारले लुकिछिपी शिकार गरेर खागको अवैध व्यापार गर्ने क्रम पनि रोकिएको छ ।