विश्व कीर्तिमान बनाएका दीपेन्द्रलाई १ लाख दिने लुम्बिनीको घोषणा

१० असोज, काठमाडौं । नेपाली राष्ट्रिय क्रिकेट टोलीका अलराउन्डर दीपेन्द्रसिंह ऐरीलाई लुम्बिनी अल स्टारले १ लाख रुपैयाँ पुरस्कार दिने घोषणा गरेको छ । 

दीपेन्द्रले चीनमा जारी १९औं एसियाली खेलकुदअन्तर्गत बुधबार मंगोलियाविरुद्ध भएको खेलमा ९ बलमा अर्धशतक पूरा गरी विश्व कीर्तिमान बनाएका छन् । कीर्तिमानीको सम्मानमा लुम्बिनीले १ लाख रुपैयाँ पुरस्कार दिने घोषणा गरेको हो । टोलीका अन्य खेलाडीलाई जनही १० हजार रुपैयाँ दिने घोषणा समेत स्टारले गरेको छ । 

दीपेन्द्र मंगोलियाविरुद्धको खेलमा १० बलको सामना गरेका उनले ८ छक्का प्रहारसहित ५० रन जाेडे । नेपालले मंगोलियाविरुद्ध २ सय ७३ रनको कीर्तिमानी जित हासिल गरेको छ  । दीपेन्द्र नेपाल प्रिमियर लिग क्लब लुम्बिनीका कप्तानसमेत हुन् ।