आजदेखि फुटपाथ व्यवसायी पनि ईःसँगै आन्दोलनमा

१० असोज, काठमाडौं । काठमाडौं महानगरभित्रबाट लखेटिएका फुटपाथ व्यावसायी पुनः आन्दोलनमा निस्केका छन् । वैकल्पिक व्यवस्था दिनुपर्ने माग गर्दै महानगरका मेयर बालेन साहको कार्यकक्ष अगाडि सडकमा उभिएर ९ दिनदेखि निरन्तर धर्ना दिइरहेका अभियन्ता ईःसँगै उनीहरु सडकमा आएका हुन् । 

उनीहरुले बुधबार कार्यालय समय सुरु भएसँगै राष्ट्रिय सभागृह अगाडि ‘गरिबलाई मार्न पाइँदैन’, गरिखान देउ, महानगर प्रहरीको ज्यादाति बन्द गर’ जस्ता नारा लेखिएका प्लेकार्ड बोकेर प्रदर्शनमा उत्रिएका छ । 

उनीहरुले मेयर साह र उपमेयर सुनिता डंगोलविरुद्ध चर्का नाराबाजी गरेका छन् । मागबारे छलफल गर्न ईः र महानगरबीचको मंगलबारको वार्ता सफल नभएपछि ईःले आज पनि धर्ना जारी राखेका छन् । उनको स्वास्थ्य बिग्रँदै गएको र खुट्टा सुन्निएर लाैराेको सहारामा परेको बताइन्छ । माग पूरा भएसम्म आन्दोलन जारी राख्ने ईःले अडान राखेका छन् । 

वार्तामा व्यवसायी र ईः का प्रतिनिधिहरूले दशैंदेखि छठसम्म पहिलेकै ठाउँमा व्यापार गर्न पाउनुपर्ने माग राखेपछि महानगरले त्यसलाई ठाडै अस्वीकार गरेको थियो । साह मेयरमा निर्वाचित भएदेखि महानगरका फुटपाथ व्यापारीलाई हटाइएको छ । फुटपाथ मिचेर बनाइएका संरचना पनि हटाउने क्रम जारी छ ।