एमसीसी प्रमुख अलब्राइट नेपाल आउँदै

१० असोज, काठमाडौं । अमेरिकाको वैदेशिक सहयोग एजेन्सी मिलेनियम च्यालेन्ज कर्पोरेसन (एमसीसी) की प्रमुख कार्यकारी अधिकृत एलीस पी अलब्राइट नेपाल आउने भएकी छन् । उनी ५ दिने भ्रमणका लागि यही असोज १४ गते कतार हुँदै नेपाल आउने भएकी छन् । एमसीसी परियोजना अन्तर्गतका नेपालभित्र कार्यान्वयनकाे अवस्थाबारे बुझ्न उनी नेपाल आउने लागेकी हुन् ।

सरकारले एमसीसी परियोजना गत भदौ १३ गतेदेखि कार्यान्वयनमा लगेको छ । नेपालमा रहँदा अलब्राइटले परियोजनाको वस्तुगत अवस्था र परियोजनाका विभिन्न स्थलमा बनाइएका सेल्टर, निर्माण स्थलको अवलोकन गर्ने छिन् ।

साथै उनले प्रधानमन्त्री प्रचण्ड, उर्जा मन्त्री शक्तिबहादुर बस्नेत, परराष्ट्रमन्त्री एनपी साउदसहितका नेपाली अधिकारीहरूलाई भेटघाट गर्ने कार्यक्रम रहेको बताइन्छ । भेटमा परियोजना कार्यान्वयनमा देखिएका समस्या समाधानबारे छलफल गर्ने छिन् । 

विद्युत प्रसारण लाइन विस्तारका लागि आवश्यक टावर निर्माणका लागि स्थानीयले जग्गा नदिने भएपछि परियोजना कार्यान्वयन थप जटिल बन्ने विश्लेषण हुन थालेको छ ।