एमालेको कर्णाली प्रदेश अधिवेशन सुरु, २ घण्टा ढिला उद्घाटन

१० असोज, काठमाडौं । नेकपा (एमाले)को कर्णाली प्रदेशको प्रथम अधिवेशन प्रदेश राजधानी वीरेन्द्र नगरमा सुरु भएको छ । अधिवेशनको उद्घाटन अध्यक्ष केपी शर्मा ओलीले गरेका छन् । 

ओली तोकिएको समयभन्दा २ घण्टा ढिला पुगेका थिए । अहिले उद्घाटन सत्र चलिरहेको  । सत्रमा पार्टीका केन्द्रीय पदाधिकारीहरुले सम्बोधन गर्नेछन् । 

अधिवेशनमा १० जिल्ला र मोर्चा संगठनबाट ६०४ जना प्रतिनिधिले भाग लिनेछन् । अधिवेशन २ दिन चल्नेछ । भोलिको बन्द सत्रले प्रदेश अध्यक्षसहित पाँच जना पदाधिकारी समेत गरेर १ सय ३५ सदस्यीय प्रदेश कमिटी चयन गर्नेछ । यहाँ पनि मतदानबाटै कमिटी चयन हुने अवस्था बलियो बन्दै गएको छ ।

लुम्बिनीमा मतदानबाट कमिटी चयन गरेको एमालेले बागमतीमा भोलि मतदानबाट प्रदेश कमिटी चयन गर्दैछ । अध्यक्ष ओलीले सहमतिबाट कमिटी बनाउन गरेको प्रयास सबैतिर विफल हुँदै गएकाे छ ।